بھارتی یوٹیوبر اور بگ باس او ٹی ٹی کے فاتح ایلویش یادیو کو ایک پارٹی میں سانپ کے زہر کو بطور تفریحی منشیات کے مشتبہ استعمال کی تحقیقات کے سلسلے میں گرفتار کر لیا گیا ہے۔

میڈیا رپورٹس کے مطابق نوئیڈا پولس نے اتر پردیش کے نوئیڈا میں منعقدہ ایک ریو پارٹی کے دوران سانپ کا زہر برآمد کرنے کے سلسلے میں مقبول یوٹیوبر ایلویش یادو کو گرفتار کیا ہے۔

معروف یوٹیوبر کو 14 روزہ جوڈیشل ریمانڈ پر جیل بھیج دیا، اطلاعات کے مطابق ایلوش سے پولیس اسٹیشن سیکٹر 113 میں پوچھ تاچھ کی جارہی ہے۔

رپورٹس میں بتایا گیا ہے کہ ایلوش یادو پر گزشتہ سال 3 نومبر کو سیکٹر 51 کے ایک بینکوئٹ ہال میں منعقدہ ایک پارٹی کے دوران سانپ کا زہر فراہم کرنے کا الزام ہے جبکہ فرانزک تجزیہ نے پارٹی سے جمع کیے گئے نمونوں میں سانپ کے زہر کی موجودگی کی تصدیق کی ہے، جس کے نتیجے میں یادو کی گرفتاری عمل میں آئی ہے۔

وائلڈ لائف ایکٹ اور آئی پی سی سیکشن 120 اے کی دفعات کے تحت الزام عائد کیا گیا ہے کہ، ایلوش یادو، چھ دیگر کے ساتھ، اس واقعے میں ملوث ہونے کے لیے قانونی کارروائی کا سامنا کر رہے ہیں۔

پولیس نے تقریب کے دوران ملزم کے قبضے سے پانچ کوبرا سمیت نو سانپ برآمد کیے تھے اور مزید تحقیقات سے یہ بات سامنے آئی کہ تمام نو سانپوں سے زہر کے غدود غائب تھے۔

الزامات کی تردید کرتے ہوئے، ایلویش یادو نے انہیں “بے بنیاد، جعلی، اور ایک فیصد بھی سچ نہیں” قرار دیا ہے۔