بھارت سے تعلق رکھنے والے معروف پنجابی گلوکار سدھو موسے والا کے قاتل گولڈی برار کو گولی مار کر ہلاک کر دیا گیا ہے۔

بھارتی میڈیا کی جانب سے جاری رپورٹس میں دعویٰ کیا گیا ہے کہ کیلیفورنیا میں مقیم پنجابی گلوکار کے قتل میں مبینہ طور پر ملوث ایک ‘گینگسٹر’ ستویندر سنگھ عرف گولڈی برار کو امریکہ میں گولی مار کر ہلاک کر دیا گیا ہے۔

گینگسٹر کو کیلیفورنیا کے فیئرمونٹ اور ہولٹ ایونیو میں مقامی وقت کے مطابق شام 5:30 بجے گولی مار کر ہلاک کیا گیا کہ جب وہ اپنے گھر کے باہر کھڑے تھے کہ نامعلوم حملہ آوروں نے ان پر فائرنگ کردی اور موقع سے فرار ہوگئے۔

رپورٹ میں بتایا گیا ہے کہ فائرنگ کے بعد دو افراد کو زخمی حالت میں قریبی اسپتال لے جایا گیا تھا، جہاں گولڈی برار کو مردہ قرار دے دیا گیا۔

خیال رہے کہ پنجابی گلوکار سدھو موسے والا کو 29 مئی 2022 کو پنجاب کے ضلع مانسا کے گاؤں جواہرکے میں گولی مار کر ہلاک کر دیا گیا تھا اور اس وقت گولڈی برار نے موسے والا کے قتل کی ذمہ داری قبول کی تھی۔

بعدازاں بھارتی وزارت داخلہ نے گینگسٹر ستوندر سنگھ عرف گولڈی برار کو غیر قانونی سرگرمیوں کی روک تھام کے قانون کے تحت دہشت گرد قرار دیا تھا۔

وزارت کی جانب سے جاری کردہ نوٹیفکیشن کے مطابق، وہ سرحد پار سے ڈرون کے ذریعے جدید اسلحہ، گولہ بارود اور دھماکہ خیز مواد کی اسمگلنگ اور قتل و غارت گری کے لیے سپلائی کرنے اور شارپ شوٹرز فراہم کرنے میں ملوث رہا ہے۔