بالی ووڈ فلم انڈسٹری کے مشہور و معروف اداکار وویک اوبرائے نے بتادیا کہ اُن کو اب فلموں میں کام کیوں نہیں ملتا۔

حال ہی میں بھارتی میڈیا کو اپنے دیے گئے ایک انٹرویو میں اداکار وویک اوبرائے نے بتایا کہ ماضی میں ایک وقت ایسا تھا، جب میری فلمیں بہت مقبول ہوتی تھیں، مجھے میرے کام کی وجہ سے ایوارڈز سے بھی نوازا جاتا تھا لیکن اب مجھے فلموں میں کوئی کام ہی نہیں ملتا۔

انہوں نے کہا کہ میں اپنے کیریئر کے عروج پر تھا کہ اچانک بالی ووڈ کے طاقتور لوگوں کے ایک گروپ نے میرا کیریئر ختم کرنے کا فیصلہ کیا، اُنہوں نے فیصلہ کیا کہ اب مجھے انڈسٹری میں کوئی کام نہیں دے گا۔

ان کا کہنا تھا کہ میرے لیے وہ زندگی کا مشکل ترین وقت تھا کیونکہ میرے پاس طاقت نہیں تھی، میرے اندر مایوسی اور غصہ تھا لیکن میں خاموش رہا اور سب کچھ برداشت کرتا رہا۔

وویک اوبرائے نے کہا کہ جب ہم کسی لابی کے ظلم کا شکار ہوتے ہیں تو ہمارے پاس صرف دو آپشنز ہوتے ہیں، پہلے آپشن میں آپ ذہنی مریض بن جاؤ اور دوسرے میں سب کچھ درگزر کرکے آگے بڑھو اور اپنا راستہ خود بناؤ۔

اداکار کے مطابق اس مشکل وقت میں میری والدہ نے میرا بہت ساتھ دیا، وہ میری ہیرو بن کر سامنے آئیں، اُنہوں نے مجھے سمجھایا کہ فلموں کے بجائے حقیقی زندگی میں کسی کے لیے ہیرو بنو، میری والدہ نے مجھ سے کہا کہ تم کسی ایسے شخص کو تلاش کرنا شروع کرو جس کے لیے تُم ہیرو بن سکو۔