بالی ووڈ فلم انڈسٹری کے مشہور و معروف اداکار شاہ رخ خان نے کہا ہے کہ میں انسانی حقوق کے کاموں میں ہمیشہ بڑھ چڑھ کر حصّہ لیتا ہوں۔

ماضی میں لندن کے کالج آف ریگولیشن کی جانب سے انسان دوست شخصیت ہونے پر ملنے والی ڈاکٹریٹ کی اعزازی ڈگری حاصل کرتے ہوئے تقریب سے خطاب کرتے ہوئے اداکار شاہ رخ خان کا کہنا تھا کہ میرا یہ عقیدہ ہے کہ غریبوں اور ضرورت مندوں کی مدد خاموشی اور باوقار انداز میں کی جانی چاہیے۔

انہوں نے کہا کہ اگر آپ سب کو بتا کر کسی کی مدد کرتے ہیں تو پھر وہ خیراتی کام بے معنی ہوجاتے ہیں۔

ان کا کہنا تھا کہ مجھے  یہ اعزاز حاصل ہوا ہے کہ میں بطورِ مشہور شخصیت اپنی حیثیت کو ایسے مقاصد حاصل کرنے کے لیے استعمال کر سکوں جن سے مجھے دلی خوشی محسوس ہوتی ہے۔

شاہ رخ خان نے کہا کہ میں خواتین کو بااختیار بنانے، پسماندہ افراد کی بحالی اور بنیادی انسانی حقوق کے کاموں میں ہمیشہ بڑھ چڑھ کر حصّہ لیتا ہوں۔

اداکار کا کہنا تھا کہ میرا یہ پختہ یقین ہے کہ دنیا میں بے شمار لوگوں سے ملنے والی محبت کی وجہ سے آج میں جس مقام پر ہوں تو اس کے بدلے میں مجھے بھی ان لوگوں کے لیے کام کرنا ہے۔

خیال رہے کہ شاہ رخ خان نے میر فاؤنڈیشن کے نام سے اپنی ایک غیر منافع بخش تنظیم بھی قائم کی ہے جو بنیادی طور پر تیزاب حملے کے متاثرہ لوگوں  کی مدد کرتی ہے اور اس  کے علاوہ اس تنظیم کا مقصد خواتین کو بااختیار بنانا بھی ہے۔