بالی ووڈ فلم انڈسٹری کے مشہور و معروف اداکار رنبیر کپور نے کہا ہے کہ لوگ آج بھی اُنہیں دھوکے باز کہہ کر پکارتے ہیں۔

حال ہی میں اپنے دیے گئے ایک انٹرویو میں معروف اداکار رنبیر کپور کا کہنا تھا کہ میرے والد بہت غصے والی شخصیت کے مالک تھے، اُنہیں چھوٹی چھوٹی باتوں پر بہت جلدی غصہ آجاتا تھا لیکن اس کے باوجود، وہ بہت ہی اچھے انسان تھے۔

انہوں نے کہا کہ میں نے کبھی اپنی والد کی آنکھوں کا رنگ نہیں دیکھا کیونکہ میں ہمیشہ اُن سے سر جھکا کر بات کرتا تھا۔

اپنی بیٹی سے متعلق ان کا کہنا تھا کہ میں جب بھی اپنی بیٹی کو گود میں اُٹھاتا ہوں تو مجھے ایسا لگتا ہے کہ میں نے اپنا دل نکال کر ہاتھ پر رکھ دیا ہے۔

اداکار نے کہا کہ عالیہ اور میرے لیے ہماری بیٹی بہت عزیز ہے بلکہ عالیہ تو راہا کو اپنے وجود کا ایک خاص حصہ سمجھتی ہیں۔

ماضی کے اپنے تعلقات کا ذکر کرتے ہوئے رنبیر کپور کا کہنا تھا کہ میں نے ماضی میں دو بہت ہی کامیاب اداکاراؤں کو ڈیٹ کیا تھا جن سے بریک اَپ کے بعد، مجھے دھوکے باز ہونے کا ٹیگ ملا۔

ان کا کہنا تھا کہ میں نے اپنی زندگی کا ایک بہت بڑا حصہ دھوکے باز ہونے کے لیبل کے ساتھ گزارا ہے اور میں آج بھی اسی لیبل کا سامنا کررہا ہوں۔

واضح رہے کہ ماضی میں رنبیر کپور نے دیپیکا پڈوکون اور کترینہ کیف کو ڈیٹ کیا تھا۔