اداکار، ہدایت کار اور ٹی وی میزبان یاسر حسین سینئر اداکار ہمایوں سعید کے دفاع میں سامنے آ گئے ہیں۔

چند روز قبل اپنے دیے گئے ایک انٹرویو میں فردوس جمال نے کہا تھا کہ میری نظر میں ہمایوں سعید ایک اچھے اداکار نہیں ہیں، انڈسٹری میں اُن سے بہتر اور باصلاحیت اداکار بھی موجود ہیں۔

ان کا کہنا تھا کہ اللہ تعالیٰ نے ہمایوں سعید کو بہت وسائل دیے ہیں، اُنہیں پلیٹ فارمز ملے ہیں اور اُنہوں نے چند اچھے ڈراموں میں کام کیا ہے جس کی وجہ سے لوگ اُنہیں پسند کرتے ہیں

انہوں نے کہا تھا کہ ہمایوں سعید اپنے وسائل کا استعمال کرتے ہوئے آگے بڑھ رہے ہیں، وہ اپنے سے کسی اچھے اداکار کو آگے نہیں آنے دیتے۔

اس تنقید کے بعد یاسر حسین پاکستانی ٹی وی میزبانوں پر برس پڑے۔

یاسر حسین نے انسٹاگرام کی اسٹوری میں جاری ایک پیغام میں کہا کہ مجھے ہمایوں سعید بہت پسند ہیں، وہ ہماری فلم انڈسٹری کے بڑے اسٹار ہیں لیکن میری نظر میں فردوس جمال صاحب بھی کمال اداکار ہیں۔

انہوں نے ٹی وی میزبانوں سے مخاطب ہوتے ہوئے کہا کہ اس عُمر میں فردوس جمال کو شوز میں بُلا کر اُن سے خاص قسم کے متنازعہ سوال پوچھنا مناسب بات نہیں ہے۔

ان کا کہنا تھا کہ ایک ہی بار فردوس جمال سے اسٹام پیپر پر لکھوا لیں کہ وہ ہمایوں سعید اور ماہرہ خان کے بارے میں کیا رائے رکھتے ہیں اور پھر اُنہیں بخش دیں۔

یاسر حسین کا یہ پیغام اداکار ہمایوں سعید نے یاسر حسین کی اسٹوری اپنی انسٹاگرام اسٹوری میں ری شیئر کرتے ہوئے کہا کہ ہاں! یہ پیغام تمام میزبانوں کے لیے ہے۔