پاکستان کے عالمی شہرت یافتہ گلوکار علی ظفر نے ایک اور سریلی آواز کی حامل گلوکارہ متعارف کرادی۔

بین الاقوامی شہرت یافتہ پاکستانی گلوکار علی ظفر نے سندھ کے دور دراز علاقے تھرپارکر کے ٹیلنٹ کو دنیا تک پہنچا دیا۔

علی ظفر نے اپنے لیبل لائٹنگیل ریکارڈز کے تحت تھرپارکر سے تعلق رکھنے والی گلوکارہ نرملا کے پہلے گانے “رنگ رسیا” کو ریلیز کرکے تمام رکاوٹیں توڑدی ہیں۔

گانے کو علی ظفر کی جانب سے پروڈیوس اور ڈائریکٹ کیا گیا ہے، گانے کی ویڈیو بنانے میں پاکستان میں پہلی بار اے آئی ٹیکنالوجی کا استعمال کیا گیا ہے۔

علی ظفر نے ایک حالیہ انسٹاگرام پوسٹ میں لکھا کہ کچھ سال پہلے مجھے یوسف صلاح الدین کی طرف سے واٹس ایپ پر ایک گانے کا ڈیمو موصول ہوا جس میں نرملا سے میرا تعارف کرایا گیا، میں فوری طور پر اس کی آواز اور کمپوزیشن کی مہارت سے متاثر ہو گیا۔

انکا کہنا تھا کہ صحرا میں رہنے کے باوجود جہاں بنیادی ضروریات جیسے پانی کی قلت ہے اور جہاں معاشرتی اصول خواتین کو موسیقی کی پیروی کرنے سے روکتے ہیں، نرملا کا جذبہ غیر متزلزل رہا۔

گلوکار علی ظفر نے مزید کہا کہ اس کے عزم نے مجھے گانے کی ریکارڈنگ، پروڈکشن اور ریلیز کا وعدہ کرنے پر مجبور کردیا، ایک بار جب ہم نے گانا مکمل کیا، میں جانتا تھا کہ ہمیں اس کی ویڈیو کے لیے واقعی کچھ خاص بنانا ہے۔

علی ظفر نے بلاول بھٹو کو ایکس پر ٹیگ کرتے ہوئے اس بات پر زور دیا کہ وہ نرملا جیسی نوجوان لڑکیوں کو سندھ کے دور دراز علاقوں میں بغیر کسی خوف کے اپنے خوابوں کو پورا کرنے میں مدد کریں۔

دوسری جانب گانے کی ریلیز پر گلوکارہ نرملا نے اپنی خوشی کا اظہار کرتے ہوئے کہا کہ میں بیان نہیں کر سکتی کہ میں کتنی خوش ہوں، تمام تعاون کے لیے علی بھائی کی بہت مشکور ہوں۔

واضح رہے کہ نرملا کا سفر امید کی ایک طاقتور علامت کے طور پر کھڑا ہے، متعدد چیلنجوں کا سامنا کرنے کے باوجود، بشمول مالی مشکلات، موسیقی کی رسمی تربیت تک رسائی کا فقدان اور کمیونٹی کی مزاحمت جہاں گانے گانا ناپسندیدہ ہے، خاص طور پر خواتین کے لیے نرملا کا غیر متزلزل جذبہ اس شاندار میوزک ویڈیو کی تخلیق کا باعث بنا ہے۔

لائٹنگیل ریکارڈز کی جانب سے جاری کردہ یہ ویڈیو پاکستان میں موسیقی اور آرٹ کے مستقبل کی جانب ایک اہم قدم ہے، اے آئی میوزک ویڈیو بنا کر علی ظفر نے ایک انوکھا اور مسحور کن تجربہ تیار کیا ہے جو تخلیقی صلاحیتوں کی حدود کو آگے بڑھاتا ہے۔

میوزک ویڈیو اب دیکھنے کے لیے دستیاب ہے، جو نہ صرف مشکلات پر فتح بلکہ پاکستان کے موسیقی اور فن کے منظر نامے میں ایک نئے دور کے آغاز کی علامت ہے۔