پاکستان شوبز انڈسٹری کی مشہور و معروف اداکارہ مریم نفیس نے کہا ہے کہ کراچی اب زندگی بسر کرنے کے لائق نہیں رہا۔

حال ہی میں اپنے دیے گئے ایک انٹرویو میں معروف اداکارہ مریم نفیس کا کہنا تھا کہ پاکستانی عوام کرپٹ اور جھگڑالو ہیں، سب اپنے مفاد کے لیے ایک دوسرے سے جھوٹ بولتے ہیں۔

انہوں نے کہا کہ پاکستان میں اگر کسی کو کوئی کام کروانا ہے تو اس کے لیے میرٹ نہیں دیکھا جاتا، ہم صرف مہنگائی کا رونا روتے ہیں جبکہ ہمارے ملک کو مہنگائی سے بڑے بڑے مسائل کا سامنا ہے لیکن ہم لاعلم ہیں۔

ان کا کہنا تھا کہ پاکستان اس وقت بین الاقوامی سظح پر مسائل سے دو چار ہے، معیشت تباہ حال ہے، ہمیں صرف مہنگائی کا سامنا نہیں ہے بلکہ ملک کے اندر کئی سنگین مسائل ہیں، جن میں سیاسی عدم استحکام، بچوں کا اغواء برائے تاوان، بچوں اور نوجوان لڑکیوں سے ہراسانی کے واقعات، جنسی زیادتی کے واقعات، گھریلو تشدد، شرحِ ناخواندگی، صحت کے مسائل وغیرہ شامل ہیں۔

مریم نفیس نے کہا کہ اس وقت کراچی کا شمار رہائش کے لیے دنیا کے خطرناک ترین شہروں کی فہرست میں دوسرے نمبر پر ہوتا ہے، مجھے کراچی پہلے ہی پسند نہیں لیکن اب یہ شہر زندگی بسر کرنے کے لائق بھی نہیں رہا۔

اداکارہ کا کہنا تھا کہ اس کا مطلب یہ نہیں ہے کہ یہاں کے عوام برے ہیں بلکہ یہاں انفرااسٹرکچر، ٹریفک، شجرکاری کے مسائل ہیں، اسٹریٹ کرائم عروج پر ہے اور عوامی رویہ بھی سمجھ سے بالا تر ہے، کوئی اس شہر کو اپنا مانتا ہی نہیں ہے۔

انہوں نے کہا کہ میں پاکستان میں خود کو غیر محفوظ محسوس کرتی ہوں کیونکہ مردوں نے پاکستان کو خواتین کے لیے غیر محفوظ ماحول بنا رکھا ہے۔