پاکستان شوبز انڈسٹری کی مشہور و معروف اداکارہ حریم فاروق نے کہا ہے کہ میں بچپن میں لیڈی ڈیانا کی طرح شہزادی بننے کے خواب دیکھتی تھی۔

حال ہی میں اپنے دیے گئے ایک انٹرویو میں معروف اداکارہ حریم فاروق کا کہنا تھا کہ بچپن میں انہیں احساس ہوتا تھا کہ وہ شاہی خاندان کا حصہ ہیں اور وہ ہر وقت لیڈی ڈیانا کی طرح شہزادی بننے کے خواب دیکھتی تھیں۔

انہوں نے کہا کہ انہیں بچپن سے ہی لیڈی ڈیانا کی طرح شہزادی بننے کا شوق تھا اور وہ ہر وقت والدین سے یہی پوچھتی رہتی تھیں کہ ان کا شاہی خاندان سے کیا تعلق ہے۔

ان کا کہنا تھا کہ انہیں لگتا تھا کہ وہ شاہی خاندان کا حصہ ہیں اور انہیں صرف شہزادی بننے کا شوق ہوتا تھا لیکن والدین انہیں ہمیشہ ایسے خواب دیکھنے سے منع کرتے اور خاموش کراکر بٹھا دیتے۔

حریم فاروق نے کہا کہ جب ان کے ذہن سے لیڈی ڈیانا بننے کا بھوت اترا تو انہوں نے سماجی رہنما مدر ٹریسا جیسا بننے کا سوچا۔

اداکارہ کا کہنا تھا کہ پھر انہوں نے غور کیا کہ مدر ٹریسا جیسا بننے کے لیے انہیں بہت ساری قربانیاں دینی پڑیں گی، انہیں بہت کچھ چھوڑنا پڑے گا جو کہ مشکل کام ہے، اس لیے انہوں نے وہ ارادہ بھی ترک کیا۔

انہوں نے کہا کہ میں نے بچپن میں کبھی نہیں سوچا تھا کہ مجھے اداکارہ بننا ہے، مجھے ایسی زندگی نہیں چاہیے تھی۔

ان کا کہنا تھا کہ وہ زندگی کو انجوائے کرنے والی خاتون ہیں، وہ جس دن نہ ہنسیں اس دن انہیں لگتا ہے کہ ان کی زندگی کا دن بیکار گزرا۔

حریم فاروق نے مزید کہا کہ مسائل ہر کسی کی زندگی میں آتے ہیں اور مسائل کو ایک دن ختم بھی ہونا ہے لیکن مسائل کا سامنا کرکے اور مسکراکر زندگی گزارنے میں اچھائی ہے اور ہر وقت خدا کا شکر ادا کرنا چاہیے۔