پاکستان شوبز انڈسٹری کے سینئر مرحوم اداکار طلعت حسین کی بیٹی، اداکارہ و پروفیسر تزئین حسین دوسری بار رشتہ ازدواج میں منسلک ہو گئیں۔

فوٹو اور ویڈیو شیئرنگ پلیٹ فارم انسٹاگرام پر اداکارہ کی قریبی دوست نے تزئین حسین کی شادی کی خوشیوں سے بھرپور تصاویر مداحوں کے ساتھ شیئر کیں، جو سادگی اور محبت کا حسین امتزاج تھیں۔

سوشل میڈیا پر شیئر کی گئی تصاویر سے یہ ظاہر ہوتا ہے کہ شادی کی خوشی بھری تقریب کو انتہائی سادگی سے منایا گیا، جس میں صرف قریبی رشتہ داروں اور عزیز و اقارب کے علاوہ دوست و احباب کو مدعو کیا گیا تھا۔

شادی کے دن تزئین حسین نے روایتی سرخ اور سنہری رنگ کے عروسی جوڑے کا انتخاب کیا جبکہ ان کا میک اپ اور زیورات سادگی سے بھرپور تھے۔

اداکارہ کی شادی کی تقریب گزشتہ روز کراچی میں منعقد ہوئی، ان کے شوہر کا نام عامر سیدین ہے، جو کراچی سے تعلق رکھتے ہیں۔

عامر سیدین مالیاتی شعبے سے تعلق رکھتے ہیں، تاہم انہوں نے “عین سین” کے نام سے مختلف کتابیں اور غزلیں بھی لکھی ہیں۔

یہ بات قابل ذکر ہے کہ تزئین حسین طویل عرصے سے شعبہ تدریس سے وابستہ ہیں اور مختلف جامعات میں ایسوسی ایٹ پروفیسر اور ڈپارٹمنٹ ہیڈ کے طور پر اپنے فرائض سرانجام دے رہی ہیں۔

واضح رہے کہ تزئین حسین نے پہلی شادی یونیورسٹی کی تعلیم کے دوران کی تھی اور انہیں پہلے شوہر سے تین بچے بھی ہیں جو اب جواں سالہ ہیں۔