بالی ووڈ اداکار سیف علی خان پر حملے کے 2 ماہ بعد ممبئی پولیس نے 1000 صفحات پر مشتمل چارج شیٹ فائل کردی ہے جس میں کئی شواہد بھی شامل ہیں۔

بھارتی میڈیا کی رپورٹ کے مطابق ممبئی پولیس نے کہا ہے کہ اس چارج شیٹ میں پولیس کو گرفتار ملزم شریف الاسلام کے خلاف ملنے والے ثبوت شامل ہیں، یہ چارج شیٹ 1000 صفحات سے زیادہ لمبی ہے۔

چارج شیٹ میں فرانزک لیب کی رپورٹ بھی شامل ہے جس میں اس بات پر روشنی ڈالی گئی ہے کہ سیف علی خان کے جسم اور ملزم سے جائے واردات سے ملنے والے چاقو کے ٹکڑے ایک ہی چاقو کے تین ٹکڑے ہیں اور یہ بھی انکشاف ہوا ہے کہ چارج شیٹ میں 70 سے زائد گواہوں کے بیانات شامل ہیں جن میں سیف علی خان، کرینہ کپور، ان کے گھریلو ملازموں کا عملہ اور دیگر شامل ہیں۔

چارج شیٹ میں بتایا گیا ہے کہ ملزم کس طرح باندرہ سے دادر اور پھر ورلی جاتے ہوئے جائے وقوعہ سے فرار ہوا۔

شیٹ میں یہ دعویٰ کیا گیا ہے کہ ملزم نے ابتدائی طور پر مین گیٹ سے اندر جانے کی کوشش کی تاہم فنگر پرنٹ ریکگنیشن سسٹم کی وجہ سے وہ اندر نہیں جا سکا اس کے بعد، اس نے اوپر چڑھنے کے لیے ڈکٹ ایریا کا استعمال کیا اور عمارت کے پچھلے حصے سے پہلی منزل تک رسائی حاصل کرنے میں کامیاب ہوگیا۔

پولیس نے چارج شیٹ میں بتایا کہ شریف سیڑھی کا استعمال کرتے ہوئے 8ویں منزل پر چڑھا اور سیف علی خان کے فلیٹ میں داخل ہوا وہ اپنے بیگ میں چاقو، ایک بلیڈ اور ایک ہتھوڑا لیے ہوئے تھا اس نے کیئر ٹیکر ایلیاما فلپ پر چاقو سے حملہ کیا اور 1 کروڑ روپے کا مطالبہ کیا۔

افسر نے بتایا کہ ملزم نے اداکار پر حملہ کیا اس بات کو سمجھے بغیر کہ وہ کون ہے، اس کا مقصد ڈکیتی کرنا تھا اور ایک بار جب اسے معلوم ہوا کہ کیا ہوا ہے وہ گھبرا کر بھاگ گیا، ملزم نیشنل کالج کے بس اسٹاپ کی طرف بھاگا جہاں اس نے دوسرے کپڑے بدلے اور رات 7 بجے تک سوتے رہا، اگلی صبح، وہ باندرہ تالاو کے علاقے میں چلا گیا، جہاں اس نے چاقو اور وہ کپڑے پھینک دیے جو اس نے واردات کے وقت پہن رکھے تھے۔

چارج شیٹ میں بتایا گیا کہ اس کے بعد ملزم تقریباً 20 منٹ تک باندرہ ریلوے اسٹیشن کے باہر گھومتا رہا، جب بارش شروع ہوئی تو وہ دادر کی طرف روانہ ہوا، جہاں اس نے ہیڈ فون سمیت کچھ خریداری کی اور بھورجی پاو کھایا پھر وہ ورلی میں اپنی گھر واپس چلا گیا۔

 پولیس کے مطابق شریف کے فنگر پرنٹ ڈکٹ ایریا سے ملنے والے فنگر پرنٹ سے مماثل ہیں۔

واضح رہے کہ 16 جنوری کو رات 3 بجے کے قریب سیف علی خان کے ممبئی کے باندرا والے گھر میں ڈکیتی کی کوشش کی گئی تھی جسے اداکار نے مزاحمت کرکے ناکام بنا دیا تھا اور وہ شدید زخمی ہوگئے تھے۔