بالی ووڈ کی معروف ڈانسر و اداکارہ ملائکہ اروڑا کے قابل ضمانت وارنٹ جاری کر دیے گئے۔

بھارتی میڈیا کی رپورٹس کے مطابق ممبئی کی ایک عدالت نے اداکارہ ملائکہ اروڑا کے خلاف سیف علی خان 2012 ہوٹل حملہ کیس میں بطور گواہ مسلسل غیر حاضری پر قابلِ ضمانت وارنٹ دوبارہ جاری کردیے ہیں۔

عدالت نے رواں ماہ کے اختتام تک قابلِ ضمانت وارنٹ کے حوالے سے رپورٹ بھی طلب کرلی ہے۔

رپورٹ میں بتایا گیا ہے کہ ہوٹل حملہ کیس 2012 میں ممبئی کے ایک فائیو اسٹار ہوٹل میں ایک این آر آئی بزنس مین اقبال شرما پر مبینہ حملے سے متعلق ہے۔

یہ واقعہ 22 فروری 2012 کو اس وقت پیش آیا جب سیف علی خان اپنی اہلیہ کرینہ کپور، ان کی بہن کرشمہ کپور، ملائکہ اروڑا، امرتا اروڑا اور کچھ دیگر دوستوں کے ہمراہ ہوٹل میں ڈنر کیلئے موجود تھے۔

پولیس کے مطابق اقبال شرما نے فنکاروں کی جانب سے کیے گئے شور و غل پر اعتراض کیا تو سیف نے مبینہ طور پر بزنس مین کو دھمکایا اور انکی ناک پر مکا مارا جس سے انہیں ناک کا فریکچر ہوا جبکہ اس بزنس مین نے یہ بھی الزام لگایا کہ سیف اور انکے ساتھیوں نے انکے سسر رمن پٹیل پر بھی حملہ کیا۔

اس کیس پر بطور گواہ پیش ہونے کے کیلئے اداکارہ ملائکہ اروڑہ کو عدالت میں پیش ہونے کا حکم دیا گیا تھا تاہم اداکارہ تاحال پیش نہ ہوئیں اس لئے اداکارہ کیخلاف قابلِ ضمانت وارنٹ جاری کیا گیا ہے جو اس سے قبل بھی ایک مرتبہ جاری کیا جاچکا ہے۔