لاہور: شوہر عاطف احمد خان کے خلاف بینک مبینہ فراڈ کے کیس میں اداکارہ نادیہ حسین نے ایف آئی اے کو بیان ریکارڈ کروا دیا۔

کروڑوں روپے فراڈ میں نادیہ حسین کے بینفشری ہونے کا معاملے پر اداکارہ بیان ریکارڈ کروانے ایف آئی اے کے دفتر پہنچیں۔

اداکارہ نے 2 صفحات پر مشتمل اپنا بیان ایف آئی اے کارپوریٹ کرائم سرکل کو ریکارڈ کروایا، جس میں شوہر کی جانب سے دیے گئے پیسوں پر بیوٹی سلون لگانے کا اعتراف کیا۔

نادیہ حسین سے ایف آئی اے کارپوریٹ کرائم سرکل کے دفتر میں ایک گھنٹہ پوچھ گچھ کی گئی، ایف آئی اے نے شوہر کے اکاؤنٹس سے نادیہ کے اکاؤنٹس میں رقوم منتقلی پر سوالات کیے۔

ایف آئی اے نے نادیہ حسین سے سوال کیا کہ 2 کروڑ 64 لاکھ روپے کی رقم کہاں استعمال کی گئی؟ جس پر اداکارہ نے جواب دیا کہ میرے شوہر نے مجھے سلون کے لیے پیسے دیے تھے، لکی ون اور طارق روڈ پر اپنی برانچ میں وہ پیسے لگائے۔

انہوں نے اپنے بیان میں کہا کہ مجھے پیسے میرے شوہر نے دیے مجھے نہیں پتہ وہ کہاں سے آئے، میرے سلون انہی پیسوں سے بنے اور میں نے ٹیکس ریٹرن میں بھی ان پیسوں کو ڈکلیئر کیا۔

اداکارہ سلون اور ٹیکس اکاؤنٹ کیس میں وکلا کے ہمراہ آئیں، جس پر ایف آئی اے افسر نے کہا کہ بیان کسی غیرمتعلقہ شخص کے سامنے ریکارڈ نہیں کرسکتے، آپ پہلے وکلاء سے مشورہ کر لیں کیا کرنا ہے۔