پاکستان کی نامور اداکارہ ماہرہ خان کو حال ہی میں لندن میں مداحوں کے ایک بے قابو ہجوم کا سامنا کرنا پڑا، جس پر سینئر اداکارہ مشی خان نے شدید ردعمل دیتے ہوئے واقعے کی مذمت اور سیکیورٹی اقدامات پر سوالات اٹھائے ہیں۔

واقعے کی وائرل ویڈیو میں دیکھا جا سکتا ہے کہ ماہرہ خان ایک عوامی تقریب میں شرکت کے دوران مداحوں کے ہجوم میں گھِر گئیں، جہاں کچھ افراد نے نازیبا اور غیرمہذب رویہ اختیار کیا، تاہم اس صورتحال پر شوبز انڈسٹری کی سینئر فنکارہ مشی خان نے سوشل میڈیا پر ویڈیو پیغام کے ذریعے اپنی ناراضگی کا اظہار کیا۔

مشی خان کا کہنا تھا کہ یہ انتہائی افسوسناک ہے کہ ایک باوقار، مشہور اور پروفیشنل اداکارہ کے ساتھ ایسا سلوک کیا گیا، ہر فنکار کی ایک ذاتی حدود ہوتی ہیں، جن کا احترام ہم سب پر لازم ہے۔

انہوں نے سیکیورٹی انتظامات پر شدید تنقید کرتے ہوئے کہا کہ ایسی تقریبات میں جہاں ہجوم متوقع ہو، وہاں سیکیورٹی کو ہر لمحہ چوکس رہنا چاہیے، سوال یہ ہے کہ جب ہجوم حد سے بڑھا، تب سیکیورٹی اہلکار کہاں تھے؟

مشی خان نے اپنی بات کو سمیٹتے ہوئے عوام اور منتظمین دونوں سے اپیل کی کہ ایسی صورتحال سے بچنے کے لیے ذمہ داری اور سنجیدگی کا مظاہرہ کیا جائے، مشہور شخصیات بھی انسان ہوتی ہیں، انہیں بھی تحفظ اور عزت کی اتنی ہی ضرورت ہوتی ہے جتنی کسی عام فرد کو ہوتی ہے۔

یاد رہے کہ یہ واقعہ سوشل میڈیا پر زیرِ بحث ہے، جہاں مداحوں نے نہ صرف ماہرہ خان کے ساتھ ہمدردی کا اظہار کیا بلکہ تقریب کے منتظمین سے سخت اقدامات کا مطالبہ بھی کیا ہے۔