بالی ووڈ کے ‘کنگ’ اداکار شاہ رخ خان نے میٹ گالا 2025 میں شاندار اور پُروقار انداز سے انٹری دی، جس نے سب کی نظریں ان پر جما دیں اور محفل کو اپنے سحر میں مبتلا کر دیا۔

شاہ رخ خان نے فیشن کی دنیا کے سب سے بڑے ایونٹ “میٹ گالا 2025” کے ریڈ کارپٹ پر اپنے پُروقار اور دلکش انداز سے جلوے بکھیرے، سب کی نگاہیں اپنی جانب کھینچ لیں اور عالمی سطح پر تہلکہ مچادیا۔

بالی ووڈ کے بادشاہ شاہ رخ خان نے ایونٹ کی تھیم کی مناسبت سے مکمل سیاہ لباس کا انتخاب کیا، ان کا مجموعی انداز سادہ اور کلاسک تھا لیکن انہوں نے بھاری بھرکم جیولری کے انتخاب سے اپنے لک میں خوبصورتی اور دلکشی کا منفرد چناؤ کیا۔

بالی ووڈ کنگ کے میٹ گالا لک میں ان کے زیورات کا انتخاب بھی خاصی توجہ کا مرکز رہا، انہوں نے چاندی کی متعدد تہوں پر مشتمل ایک خوبصورت چین پہنی جبکہ ان کے گلے میں جھولتا ہوا بڑا سا “K” پینڈنٹ سب کی نگاہوں کا مرکز بن گیا، جو بلاشبہ “کنگ خان” کی شان دار شناخت کی عکاسی کرتا ہے۔

شاہ رخ خان نے اپنے ہاتھوں میں متعدد انگوٹھیاں پہن کر اپنے لک میں ایک منفرد اور ڈرامائی انداز شامل کیا جبکہ سبیاساچی کی پہچان سمجھی جانے والی خاص بروچ کو بھی اپنے کوٹ کا حصہ بنا کر نفاست کا مظاہرہ کیا۔

یہ شاہ رخ خان کی میٹ گالا میں پہلی شرکت تھی، مگر ان کی پُراعتماد انٹری، شاندار انداز اور فیشن کے جرات مندانہ انتخاب نے ایسی دھوم مچائی کہ ہر طرف صرف انہی کا چرچا رہا۔

شاہ رخ خان کی تصاویر اور ویڈیوز سوشل میڈیا پر تیزی سے وائرل ہو گئیں، ان کے لک کو لاکھوں صارفین نے بے حد پسند کیا جبکہ بین الاقوامی فیشن ناقدین نے بھی ان کے انداز کی خوب تعریف کی۔

واضح رہے کہ میٹ گالا، جسے ‘فیشن کی دنیا کا سب سے بڑا ایونٹ’ تصور کیا جاتا ہے، ہر سال نیویارک میں منعقد ہونے والی ایک نمایاں فنڈ ریزنگ تقریب ہے، جس کا مقصد میٹروپولیٹن میوزیم آف آرٹ کے کاسٹیوم انسٹیٹیوٹ کے لیے فنڈز جمع کرنا ہوتا ہے۔