پاکستانی گلوکار فلک شبیر نے عاطف اسلم سمیت دیگر گلوکاروں کو نصرت فتح علی خان کی قوالیوں کے مسلسل استعمال پر تنقید کا نشانہ بناتے ہوئے کہا کہ موسیقی میں اصل تخلیق کی ضرورت ہے، ری میکس کافی نہیں، کچھ نیا تخلیق کریں۔

فلک شبیر موسیقی کی دنیا میں ایک جرات مندانہ بیان دے کر خبروں کی زینت بنے ہوئے ہیں، انہوں نے عاطف اسلم سمیت ان گلوکاروں پر تنقید کی ہے جو نیا اور تخلیقی کام کرنے کے بجائے نصرت فتح علی خان کی مشہور قوالیوں کے ری میکس پر انحصار کر رہے ہیں۔

حال ہی میں فلک شبیر نے اپنے انسٹاگرام پر ایک اسٹوری شیئر کی جس میں انہوں نے طنزیہ الفاظ میں لکھا کہ خان صاحب کو ان کی آخری آرام گاہ میں تو آرام کرنے دیں پلیز اور کچھ نیا اور اصلی کام کریں۔

فلک شبیر کا کہنا ہے کہ اصل فنکار وہی ہوتا ہے جو خود کچھ نیا تخلیق کرے، نہ کہ دوسروں کے بنائے ہوئے فن کو بار بار پیش کرے۔

گلوکار کے اس بیان کے بعد مداحوں کی جانب سے ملے جلے ردعمل سامنے آرہے ہیں، تقریباً ہر کسی نے اندازہ لگا لیا کہ فلک شبیر کا اشارہ عاطف اسلم کی طرف ہے، جنہوں نے حال ہی میں نصرت فتح علی خان کی مشہور قوالی کو دوبارہ گایا ہے۔

کئی لوگ عاطف اسلم کی حمایت کررہے ہیں اور کہہ رہے ہیں کہ فلک شبیر صرف اُن سے حسد کر رہے ہیں، جبکہ کچھ افراد کا ماننا ہے کہ عاطف اسلم نے نصرت فتح علی خان کے شاہکار کو برباد کردیا ہے اور اب وقت آ گیا ہے کہ وہ اصل اور نیا میوزک تیار کریں۔