پاکستان کی معروف اداکارہ سحر ہاشمی کی شریکِ حیات کیلئے سادگی بھری خواہشات سامنے آگئی ہیں۔

اداکارہ سحر ہاشمی نے حال ہی میں ایک یوٹیوب انٹرویو میں اپنے ممکنہ شریکِ حیات کے لیے دلچسپ اور سادہ خواہشات کا اظہار کیا ہے۔

سحر ہاشمی نے گفتگو کے دوران بتایا کہ وہ ایک ایسے جیون ساتھی کی خواہش رکھتی ہیں جو محض ظاہری شخصیت نہیں بلکہ عملی طور پر ایک خیال رکھنے والا انسان ہو۔

ان کا کہنا تھا کہ میں چاہتی ہوں کہ میرا شوہر مجھے کھانا کھلائے، میرے تھکے ہوئے پیر دبائے اور سب سے اہم بات اُسے چائے بنانی آنی چاہیے، میرے خیال میں ہر مرد کو چائے بنانی آنی چاہیے، یہ واقعی ضروری ہے۔

اپنی شخصیت پر روشنی ڈالتے ہوئے سحر ہاشمی نے اعتراف کیا کہ وہ ایک جذباتی انسان ہیں اور بعض اوقات پریشانی میں شدید ردعمل دیتی ہیں، اس لیے میں ایک ایسے ساتھی کی متلاشی ہوں جو متوازن، تحمل مزاج اور سمجھدار ہو، جو میری بات سنے اور مجھے جذباتی طور پر سنبھال سکے۔

اداکارہ کا کہنا تھا کہ وہ ایسے تعلق کی خواہش مند ہیں جس میں دونوں ایک دوسرے کو سمجھیں، قبول کریں اور ایک دوسرے کی کمزوریوں کو سہارا دیں۔

سحر ہاشمی کے اس خالص اور حقیقت پسندانہ مؤقف کو سوشل میڈیا پر سراہا جا رہا ہے، مداحوں کا کہنا ہے کہ ان کا یہ کھرا انداز اور سادگی آج کے مصنوعی رویوں سے بھرے ماحول میں ایک خوشگوار تازگی ہے۔