پاکستان کے معروف یوٹیوبر رجب بٹ اپنی اہلیہ ایمان بٹ کے ساتھ نامناسب رویہ اختیار کرنے پر ایک بار پھر سوشل میڈیا پر تنقید کی زد میں آ گئے ہیں۔

یوٹیوبر رجب بٹ ایک بار پھر سوشل میڈیا صارفین کی تنقید کا مرکز بن گئے ہیں اور اس بار وجہ ان کی اپنی اہلیہ ایمان بٹ کے ساتھ ویلاگ میں رکھا گیا رویہ ہے۔

حال ہی میں جاری ہونے والے فیملی ڈنر ویلاگ میں رجب بٹ کو اپنی بہن غزل کو کھانے کی پیشکش کرتے ہوئے تو دیکھا گیا، تاہم ناظرین نے نوٹ کیا کہ انہوں نے اسی دوران اپنی اہلیہ کو مکمل طور پر نظرانداز کیا، جس پر سوشل میڈیا صارفین نے برہمی کا اظہار کیا۔

کئی صارفین نے رجب بٹ کے انداز کو “غیر مناسب” قرار دیتے ہوئے کہا کہ وہ بلاشبہ ایک اچھے بھائی اور بیٹے ہوں گے، لیکن انہیں شوہر کے طور پر بھی توازن کا مظاہرہ کرنا چاہیے۔

 کچھ صارفین نے ایمان بٹ کی برداشت کو سراہتے ہوئے انہیں “باوقار اور بردبار” قرار دیا۔

دوسری جانب رجب بٹ کے مداحوں کی بڑی تعداد نے ویلاگ کو مجموعی طور پر پسند بھی کیا، تاہم اہلیہ کے ساتھ رویے پر اعتراضات بھی نمایاں رہے۔

یاد رہے کہ رجب بٹ کے یوٹیوب پر 6.75 ملین سبسکرائبرز ہیں اور وہ سوشل میڈیا کے مختلف پلیٹ فارمز پر بھی خاصی شہرت رکھتے ہیں، تاہم اس واقعے نے ایک بار پھر عوامی شخصیات کے ذاتی رویوں پر آن لائن تنقید اور بحث کو جنم دیا ہے۔