جون 2023 میں بحرِ اوقیانوس کی گہرائیوں میں آبدوز ’ٹائٹن‘ کے پھٹنے اور تباہ ہونے کا واقعہ اب نیٹ فلکس کی ایک نئی دستاویزی فلم کی شکل میں سامنے آئے گا۔

یہ آبدوز اوشین گیٹ کمپنی کی ملکیت تھی، جو سمندر کی تہہ میں ٹائٹینک کے ملبے تک پہنچنے کی ایک جرات مندانہ مہم پر نکلی تھی، بدقسمت سانحے میں آبدوز کے عملے کے پانچ افراد جان کی بازی ہار گئے، جن میں پاکستان کے معروف صنعتکار شہزادہ داؤد اور ان کے نوجوان بیٹے سلیمان داؤد بھی شامل تھے۔

نیٹ فلکس کی اس دستاویزی فلم کا عنوان ہے ’ٹائٹن: دی اوشین گیٹ ڈیزاسٹر‘، جس کا پریمیئر 6 جون کو ٹریبیکا فلم فیسٹیول میں کیا جائے گا اور 11 جون سے یہ نیٹ فلکس پر دستیاب ہوگی۔

 فلم کی ہدایتکاری مارک مونرو نے کی ہے جبکہ اسے معروف پروڈکشن ٹیم ’اسٹوری سنڈیکیٹ‘ نے تیار کیا ہے، جنہوں نے قبل ازیں کئی کامیاب دستاویزی فلمیں بنائی ہیں۔

فلم میں آبدوز کی تباہی کے اسباب اور اس کے پس پردہ عوامل کو تفصیل سے اجاگر کیا گیا ہے، اس میں انٹرویوز، آڈیو ویزول مواد اور چشم دید گواہوں کی کہانیوں کو شامل کیا گیا ہے اور خاص طور پر اوشین گیٹ کے بانی اور سی ای او اسٹاکٹن رش کی شخصیت، ان کے خواب، خطرات کا سامنا کرنے کا جنون اور شہرت کی طلب پر بھی روشنی ڈالی گئی ہے۔

ماہرین کا کہنا ہے کہ ٹائٹن کی ناکامی ایک وقت کی بات تھی، کیونکہ اس کی ڈیزائن اور ساخت ایسے خطرات کے لیے تیار نہیں تھی۔

سی ای او اسٹاکٹن رش کی شخصیت کو کچھ انٹرویوز میں “ذہنی مریض” قرار دیا گیا اور سوال اٹھایا گیا کہ ایسے شخص کو کون روک سکتا ہے جو ہر فیصلے کو اپنی ذات کے اوپر سمجھتا ہو۔

رش کی اپنی آواز بھی فلم میں شامل ہے، جس میں وہ کہتے ہیں کہ ’’مجھے موت کی خواہش نہیں، میں خطرے کو سمجھتا ہوں، میری نگرانی میں کوئی نہیں مرے گا۔‘‘ تاہم، حقیقت اس کے برعکس ثابت ہوئی۔

یاد رہے کہ یہ حادثہ 18 جون 2023 کو پیش آیا، جب آبدوز بحرِ اوقیانوس کی تہہ میں تھی، چار دن بعد 22 جون کو آبدوز کی تباہی کی تصدیق ہوئی اور عالمی ریسکیو مشن بھی ختم ہو گیا، جس نے دنیا بھر کی توجہ حاصل کی۔

یہ دستاویزی فلم صرف ایک المناک حادثے کی داستان نہیں، بلکہ انسانی جستجو، غیر محتاط خوابوں اور خطرناک فیصلوں کی وہ عکاسی ہے جسے دنیا بھر کے لوگ دیکھیں گے۔