پاکستانی ٹک ٹاکر اور ماڈل اریکا حق نے ٹک ٹاکرز پر الزام عائد کرت ہوئے کہا کہ کچھ سوشل میڈیا شخصیات شہرت حاصل کرنے اور ویوز کی خاطر اپنی نازیبا ویڈیوز خود لیک کررہی ہیں۔

ایک حالیہ انٹرویو میں ٹک ٹاکر اریکا حق نے سوشل میڈیا پر شہرت حاصل کرنے کے متنازع رجحان پر کھل کر بات کرتے ہوئے کہا کہ بعض سوشل میڈیا انفلوئنسرز جان بوجھ کر اپنی نازیبا ویڈیوز لیک کرواتی ہیں تاکہ ویوز، شہرت اور عوام کی توجہ حاصل کی جا سکے۔

اریکا کے مطابق پہلے جوڑوں کی ویڈیوز بنا کر مقبولیت حاصل کرنے کا رجحان تھا لیکن جب وہ رجحان ماند پڑا تو کچھ افراد نے حدیں پار کرتے ہوئے زیادہ متنازع راستے اپنانا شروع کردیے۔

انہوں نے کہا کہ یہ بات سب پر لاگو نہیں ہوتی لیکن چند واقعات میں واضح طور پر ایسا دیکھا گیا کہ ویڈیوز جان بوجھ کر وائرل کی گئیں، میں پہلے یہ سمجھتی تھی کہ تمام متاثرہ لڑکیاں ظلم کا شکار ہیں لیکن اب لگتا ہے کہ بعض کیسز میں ایسا دانستہ طور پر بھی کیا جا رہا ہے۔

اریکا حق نے اس بات پر زور دیا کہ وہ خود کبھی کسی لڑکے کے ساتھ ایسی ویڈیوز کا حصہ نہیں بنیں اور نہ ہی انہوں نے سستی شہرت کے لیے اس قسم کے ہتھکنڈے اپنائے۔

انہوں نے خود کو ایک محتاط اور ذمہ دار سوشل میڈیا صارف قرار دیا جو اپنی شخصیت اور کردار کی ساکھ کا خاص خیال رکھتی ہیں۔

واضح رہے کہ حالیہ مہینوں میں کئی معروف ٹک ٹاکرز کی مبینہ نازیبا ویڈیوز سوشل میڈیا پر وائرل ہوچکی ہیں، جن میں مناہل ملک، سجل ملک، سامعہ حجاب، امشا رحمان اور علیزہ سحر جیسے نام شامل ہیں۔