پاکستان کے معروف مارننگ شو کی میزبان اور اداکارہ ندا یاسر نے اپنی ذاتی زندگی سے متعلق ایک حیران کن انکشاف کرتے ہوئے کہا ہے کہ دوستانہ اور لاپرواہ فطرت کے باعث میری فیملی، خاص طور پر بچے کئی بار نظرِبد کا شکار ہو چکے ہیں۔

ایک حالیہ انٹرویو میں گفتگو کرتے ہوئے ندا یاسر نے کہا کہ میں نے کئی مواقع پر ذاتی طور پر محسوس کیا ہے کہ نظرِ بد ایک حقیقت ہے اور اس کا اثر سب پر ہوتا ہے، خاص طور پر بچوں پر، کیونکہ جب بھی میں اپنے بچوں کی تصاویر سوشل میڈیا پر شیئر کرتی تھی، تو وہ چند دنوں کے اندر بیمار ہوجاتے تھے۔

انہوں نے کہا کہ یہ میرے لیے ایک آزمودہ تجربہ ہے، اب میں سمجھتی ہوں کہ لوگ بچوں کی تصاویر پر ایموجیز کیوں لگاتے ہیں، پہلے میں ان باتوں کو نظر انداز کرتی تھی، مگر اب میں سمجھ چکی ہوں۔

ندا یاسر نے بتایا کہ حال ہی میں اپنی سالگرہ کی ویڈیو پوسٹ کرنے کے بعد بھی مجھے یہی احساس ہوا، جس پر میں نے اللہ سے دعا کی کہ “ہمیں نظرِ بد سے محفوظ رکھے”۔

اداکارہ کا کہنا تھا کہ میری فطرت ایسی ہے کہ میں خوشی چھپا نہیں سکتی، میرے لیے دوستوں سے خوشیاں بانٹنا بہت اہم ہے، چاہے وہ کسی کامیابی کی ہو یا ذاتی لمحوں کی۔ میں جذبات کا اظہار کرتی ہوں کیونکہ یہ میرے لیے سکون کا باعث بنتا ہے۔

ندا یاسر نے تسلیم کیا کہ میں اکثر ممکنہ منفی اثرات یا “نظر” کے بارے میں زیادہ نہیں سوچتیں، مگر اب ماضی کے تجربات سے سیکھ رہی ہیں۔