پاکستان کے مایہ ناز اداکار عمران عباس نے بھارتی پنجابی فلم سردار جی 3 کی یکم محرم کو پاکستان میں ریلیز کیے جانے پر تحفظات کا اظہار کرتے ہوئے اس اقدام کو غیر مناسب قرار دیا ہے۔

اداکار عمران عباس نے سوشل میڈیا پر فلم کی ریلیز کے وقت پر سوال اٹھایا اور مذہبی ایام کے تقدس کو مدنظر رکھنے کی ضرورت پر زور دیا۔

فیس بک پر شیئر کی گئی پوسٹ میں عمران عباس نے لکھا کہ میں نے اس سے قبل کبھی نہیں دیکھا کہ فلمیں پاکستان میں یکم محرم کو ریلیز کی جائیں، یہ شیعہ یا سنی ہونے کا مسئلہ نہیں، بلکہ ان ایّام کا احترام ہم سب مسلمانوں پر لازم ہے۔

انہوں نے کہا کہ ماضی میں پاکستان ٹیلی ویژن پر محرم کے دوران میوزک کے بغیر خصوصی نشریات ہوتی تھیں لیکن اب حالات بدل چکے ہیں۔

اداکار کا کہنا تھا کہ اب ہم 9 محرم کو بھی ڈانس اور میوزیکل شوز نشر ہوتے دیکھتے ہیں اور لوگ ان چھٹیوں کو محض تفریح کے مواقع کے طور پر لینے لگے ہیں۔

انہوں نے اپنے پیغام میں اپیل کی کہ رمضان، ربیع الاول اور محرم جیسے مہینوں کا وقار بحال رکھا جائے، چاہے کوئی بھی فرقہ ہو، ان دنوں کا احترام ہم سب پر لازم ہے۔

سردار جی 3 کی ریلیز کے بارے میں عمران عباس نے کہا کہ میں جانتا ہوں کہ فلم کی کاسٹ کا اس میں کوئی قصور نہیں، انہوں نے اپنا کام کیا لیکن ریلیز کے وقت کا تعین متعلقہ اداروں کی ذمہ داری ہے، فلم بلاک بسٹر ہے اگر ریلیز چند دن مؤخر کر دی جاتی تو اس کی کامیابی پر کوئی فرق نہ پڑتا۔

یاد رہے کہ سردار جی 3 میں پاکستانی اداکارہ ہانیہ عامر اور بھارتی اداکار دلجیت دوسانجھ مرکزی کرداروں میں جلوہ گر ہیں اور دو روز قبل فلم پاکستان میں کامیاب اوپننگ کے ساتھ ریلیز ہوئی ہے۔