پاکستان شوبز انڈسٹری کے معروف اداکار و گلوکار فرحان سعید کا پاکستانی ڈراموں پر بھارتی پابندی کے حوالے سے واضح مؤقف سامنے آگیا۔

حال ہی میں اداکار فرحان سعید نے اپنے ڈرامے “شیرین فرہاد” کی ٹیم کے ہمراہ نجی ٹی وی کو دیے گئے ایک انٹرویو میں پاکستانی ڈراموں پر بھارتی پابندی کے حوالے سے کھل کر بات کی۔

اس موضوع پر گفتگو کرتے ہوئے فرحان سعید نے کہا کہ اس پابندی سے ممکن ہے ہمارے ویوز متاثر ہوں لیکن اس سے کوئی خاص فرق نہیں پڑتا۔

انکا کہنا تھا کہ ہم پہلے ہی 26 کروڑ لوگوں کے لیے ڈرامے بنا رہے ہیں اور یہ سلسلہ پی ٹی وی کے دور سے جاری ہے، ہم نے کبھی بھارتی ناظرین کو ذہن میں رکھ کر کام شروع نہیں کیا۔

اداکار نے مزید کہا کہ ظاہر ہے جب آپ ایک بڑی ناظرین کی تعداد کے عادی ہو جائیں تو اُس میں کمی مایوس کرتی ہے، مگر یہ نقصان ہمارا نہیں بلکہ اُن کا ہے، وہ ہمارے ڈرامے اس لیے دیکھتے تھے کیونکہ ہمارا مواد اچھا ہے، وہ ہماری فلمیں اس لیے نہیں دیکھتے کیونکہ وہ اتنی اچھی نہیں ہوتیں، اصل بات یہی ہے کہ اچھا مواد اپنی راہ خود بناتا ہے۔

دوسری جانب اداکارہ کنزہ ہاشمی نے بھی فرحان سعید کی بات سے اتفاق کرتے ہوئے کہا کہ بھارتی ناظرین نے ہمارے ڈرامے صرف حالیہ برسوں میں دیکھنا شروع کیے، اس سے پہلے تو صرف پاکستانی عوام ہی ہماری ناظر تھی، اس لیے یہ پابندی ہمارے لیے کوئی نئی یا بڑی رکاوٹ نہیں۔

فرحان سعید کی اس گفتگو کو سوشل میڈیا پر کافی سراہا جارہا ہے، جہاں صارفین ان کی حقیقت پسندی اور صاف گوئی کو پسند کر رہے ہیں۔