قربانی کے جانوروں کی بڑھتی ہوئی قیمتوں پر تبصرہ کرتے ہوئے پاکستان کے معروف اور سینئر اداکار نعمان اعجاز سوشل میڈیا پر تنقید کا نشانہ بن گئے۔

اداکار نعمان اعجاز نے حال ہی میں انسٹاگرام پر ایک طنزیہ پوسٹ شیئر کی، جس میں انہوں نے لکھا کہ سب کو آئی فون مہنگا لگتا ہے لیکن جیسے ہی قربانی کا جانور لینے جاتے ہیں تو لگتا ہے جیسے بیوپاری جائیداد کے کاغذات مانگ رہے ہوں۔

پوسٹ کے فوراً بعد سوشل میڈیا صارفین میں شدید ردعمل دیکھنے میں آیا، کئی افراد نے ان پر قربانی جیسے مذہبی عمل کا مذاق اڑانے کا الزام لگایا، ایک صارف نے لکھا کہ آئی فون خریدنے میں کسی کو مسئلہ نہیں لیکن جب اللہ کی راہ میں خرچ کرنے کی بات آتی ہے تو سب کو مہنگائی یاد آجاتی ہے؟

دوسرے صارف نے تبصرہ کیا کہ قربانی نہیں کرسکتے تو نہ کریں لیکن اس کا مذاق اڑانا کہاں کا انصاف ہے؟

تاہم، تنقید کے ساتھ ساتھ اداکار کے حق میں آوازیں بھی اٹھیں، کئی سوشل میڈیا صارفین نے کہا کہ نعمان اعجاز کا مقصد قربانی کو ہدف بنانا نہیں تھا بلکہ مہنگائی کی طرف توجہ دلانا تھا۔

ایک صارف نے لکھا کہ انہوں نے صرف یہ دکھایا کہ بیوپاری کیسے قیمتیں بڑھا چڑھا کر مانگتے ہیں، اس میں قربانی کا مذاق نہیں ہے بلکہ منڈی کی حقیقت بیان کی گئی ہے۔

نعمان اعجاز اس سے قبل بھی ایک پوسٹ میں مرغی کی تصویر شیئر کرتے ہوئے مہنگائی پر طنز کر چکے ہیں، جس پر لوگوں نے ان کی بات سے اتفاق کیا تھا۔

یاد رہے کہ قربانی کے جانوروں کی بڑھتی قیمتیں ایک سنجیدہ عوامی مسئلہ بن چکی ہیں اور اس حوالے سے سوشل میڈیا پر بحث مسلسل جاری ہے، نعمان اعجاز کی پوسٹ اسی معاشرتی پس منظر میں سامنے آئی، جس پر عوام کا ردعمل دو حصوں میں بٹ گیا ہے۔