عیدالاضحیٰ کے موقع پر ریلیز ہونے والی پاکستانی رومانوی کامیڈی فلم “لو گرو” نے سینما گھروں میں شاندار انٹری دی ہے اور شائقینِ فلم کی بھرپور توجہ حاصل کر لی ہے۔

فلم کا گانا ’رات کے سائے‘ سوشل میڈیا اور میوزک پلیٹ فارمز پر دھوم مچا چکا ہے، اس گانے میں اداکارہ رمشا خان اور ہمایوں سعید نے اداکاری کی ہے جبکہ اسے معروف گلوکارہ آئمہ بیگ نے اپنی آواز دی ہے۔

’لو گرو‘ کے گانے پر رمشا خان کی دلکش پرفارمنس، رقص اور اسٹائل کو مداحوں کی جانب سے بے حد پسند کیا جا رہا ہے۔

ندیم بیگ کی ہدایت کاری اور واسع چوہدری کی تحریر کردہ اس فلم کو ناظرین کی جانب سے زبردست پذیرائی حاصل ہو رہی ہے۔

فلم میں ماہرہ خان اور ہمایوں سعید نے مرکزی کردار نبھائے ہیں، جو 11 سال بعد ایک ساتھ اسکرین پر جلوہ گر ہوئے ہیں، ان کی اسکرین پر دوبارہ جوڑی نے فلم بینوں کو خوشگوار حیرت میں ڈال دیا ہے۔

’لو گرو‘ کی کہانی ایک نوجوان کی زندگی کے گرد گھومتی ہے جو ایک باصلاحیت آرکیٹیکٹ، صوفیہ، کی محبت میں گرفتار ہوجاتا ہے، رومانوی مزاح اور جذبات سے بھرپور اس کہانی کو کراچی اور لندن کے خوبصورت مناظر میں فلمایا گیا ہے، جہاں کی سنیماٹوگرافی کو بھی ناظرین نے خوب سراہا ہے۔