بھارت میں پابندی کے شکار کئی پاکستانی اداکاروں اور اداکاراؤں کے سوشل میڈیا اکاؤنٹس کی اچانک بحالی اور پھر دوبارہ بندش نے جہاں صارفین کو حیرت میں ڈال دیا، وہیں اس صورتحال کے پیچھے کی اصل وجہ بھی سامنے آ گئی ہے۔

گزشتہ روز بھارتی سوشل میڈیا صارفین نے اچانک اپنی ٹائم لائن پر پاکستانی فنکاروں کی پوسٹس دیکھیں، جن میں دانش تیمور، احد رضا میر، ماورا حسین اور یمنیٰ زیدی شامل تھے۔

ان فنکاروں کے اکاؤنٹس تک رسائی بغیر کسی وی پی این کے ممکن ہوگئی تھی، جس سے یہ تاثر پیدا ہوا کہ ان پر عائد سوشل میڈیا پابندیاں غیراعلانیہ طور پر ختم کردی گئی ہیں۔

تاہم چند ہی گھنٹوں بعد ان اکاؤنٹس پر دوبارہ رسائی بند کردی گئی، جس سے بھارتی سوشل میڈیا صارفین اور مبصرین میں تشویش اور قیاس آرائیاں جنم لینے لگیں۔

اب بھارتی حکومت کی جانب سے اس صورتحال پر باضابطہ وضاحت سامنے آگئی ہے۔

 بھارتی میڈیا کے مطابق حکام نے اس تبدیلی کو “تکنیکی مسئلہ” قرار دیا اور کہا ہے کہ یہ اکاؤنٹس عارضی طور پر بحال ہوئے تھے اور کوئی پالیسی تبدیلی یا دانستہ اقدام اس کے پیچھے نہیں تھا۔

واضح رہے کہ بھارت میں متعدد پاکستانی شخصیات کے سوشل میڈیا اکاؤنٹس پر مختلف اوقات میں رسائی محدود یا مکمل طور پر بند کی جاتی رہی ہے، جو بیشتر اوقات دونوں ممالک کے درمیان کشیدہ تعلقات کے تناظر میں دیکھے جاتے ہیں۔