پاکستانی شوبز انڈسٹری کی ابھرتی ہوئی اداکارہ علیزے شاہ، جو ماضی میں ”سپر اسٹار“ اور ”عہدِ وفا“ جیسے مقبول پراجیکٹس میں اپنی اداکاری سے ناظرین کے دل جیت چکی ہیں، حالیہ عرصے میں اسکرین سے غیر حاضر نظر آ رہی ہیں، تاہم مداحوں کی جانب سے بارہا پوچھے گئے سوالات کے جواب میں اداکارہ نے بالآخر خاموشی توڑ دی ہے۔

اپنے ایک حالیہ انٹرویو میں علیزے شاہ نے انڈسٹری سے وقتی کنارہ کشی کی وجوہات پر روشنی ڈالی اور بتایا کہ انڈسٹری میں کئی پیشہ ورانہ مسائل، خاص طور پر خواتین فنکاروں کے ساتھ غیر اخلاقی رویہ، انہیں مایوسی کی طرف لے گئے۔

اداکارہ نے دعویٰ کیا کہ کچھ شادی شدہ مرد، انڈسٹری میں کام کرنے والی خواتین کے ساتھ غیر مناسب برتاؤ اختیار کرتے ہیں، جو کہ ایک نہایت تکلیف دہ تجربہ ہوتا ہے۔

انہوں نے اس بات پر بھی زور دیا کہ انہوں نے ہمیشہ عزت اور محنت کے ساتھ اپنا مقام بنایا لیکن اس کے باوجود انہیں اکثر تنقید کا نشانہ بنایا جاتا ہے۔

علیزے شاہ نے معاوضے کی بروقت ادائیگی کے مسئلے کو بھی اجاگر کیا اور بتایا کہ کئی پروڈکشن ہاؤسز 3 سے 4 ماہ تک اداکاری کا معاوضہ نہیں دیتے، جس پر فنکاروں کو متعدد بار یاد دہانی کروانی پڑتی ہے۔

انکا کہنا تھا کہ اپنے ہی کمائے گئے پیسے حاصل کرنے کے لیے بار بار فون اور پیغامات کرنا فنکار کی تضحیک کے مترادف ہے۔

اداکارہ نے یہ بھی واضح کیا کہ وہ آئندہ صرف انہی منصوبوں کا حصہ بنیں گی جہاں پیشہ ورانہ ماحول میسر ہو اور بروقت معاوضہ ادا کیا جائے۔

علیزے شاہ کے ان بیانات پر سوشل میڈیا پر مختلف آراء دیکھنے کو مل رہی ہیں، بعض صارفین نے ان کی ایمانداری اور ہمت کو سراہا جبکہ کچھ نے ان کے مؤقف پر تنقید بھی کی۔