چین کے شہر یانگ ژو میں منعقد ہونے والے شنگھائی کوآپریشن آرگنائزیشن (ایس سی او) فلم فیسٹیول 2025 میں پاکستان کی دو نمایاں فلموں ’دیمک‘ اور ’نایاب‘ نے شاندار کامیابیاں حاصل کیں، جو بین الاقوامی سطح پر پاکستانی سینما کی ترقی کی ایک خوش آئند علامت ہے۔

عیدالاضحیٰ کے موقع پر ریلیز کی جانے والی ہارر تھرلر فلم ’دیمک‘ نے “بیسٹ ایڈیٹنگ” کا ایوارڈ جیتا جبکہ جنوری 2024 میں ریلیز ہونے والی فلم ’نایاب‘ کو “اسپیشل جیوری ایوارڈ” سے نوازا گیا۔

پانچ روزہ فیسٹیول میں فلم ’دیمک‘ کے ہدایتکار رافع راشدی اور اداکارہ سونیا حسین نے ایڈیٹنگ ایوارڈ وصول کیا جبکہ ’نایاب‘ کی ٹیم کی جانب سے ہدایتکار عمیر ناصر علی اور اداکار اسامہ خان نے جیوری ایوارڈ اپنے نام کیا۔

فیسٹیول میں پاکستان کی نمائندگی کرنے والے وفد میں اہم شخصیات شامل تھیں، جن میں پاکستان فلم پروڈیوسرز ایسوسی ایشن کے چیئرمین شہزاد رفیق (جیوری ممبر)، معروف فلم ڈسٹری بیوٹر ندیم مانڈوی والا، عرفان ملک، وزیرِ مملکت برائے تعلیم وجیہہ قمر، ڈی جی ڈی ای ایم پی ثمینہ فرزین، پاکستان ایمبیسی چائنا سے منظور علی، فلم ’نایاب‘ کی پروڈیوسر رومینہ عمیر، نعمان خان اور اداکار اسامہ خان شامل تھے۔

فلم ’دیمک‘ ایک ماورائی اور سنسنی خیز کہانی جو ساس بہو کے پیچیدہ رشتے کے گرد گھومتی ہے اور جس کا مرکزی خیال ایک ایسے گھر میں بڑھتی ہوئی پراسرار سرگرمیوں پر مبنی ہے۔

فلم کی اسٹار کاسٹ میں جاوید شیخ، ثمینہ پیرزادہ، بشریٰ انصاری، سونیا حسین، فیصل قریشی اور ثمن انصاری شامل ہیں۔

تاہم فلم ’نایاب‘ ایک متاثر کن کہانی جو ایک نوجوان لڑکی کی زندگی، اس کے کرکٹ کے خواب اور سماجی و خاندانی رکاوٹوں سے لڑنے کے حوصلے کو پیش کرتی ہے۔

 اس فلم میں یمنیٰ زیدی، جاوید شیخ، عدنان صدیقی، اسامہ خان، فواد خان اور فریال محمود نے اہم کردار ادا کیے۔

ان ایوارڈز کے ذریعے پاکستانی فلم انڈسٹری کو عالمی سطح پر جو پذیرائی ملی ہے، یہ نہ صرف فلم سازوں کے لیے حوصلہ افزا ہے بلکہ بین الاقوامی پلیٹ فارمز پر پاکستان کی ثقافتی اور تخلیقی صلاحیتوں کا اعتراف بھی ہے۔