معروف اداکارہ اور ماڈل کومل میر نے اپنی حالیہ جسمانی تبدیلی سے متعلق سوشل میڈیا پر ہونے والی قیاس آرائیوں پر ردعمل دیتے ہوئے وضاحت پیش کر دی ہے۔

کومل میر ان دنوں اپنے بدلے ہوئے چہرے اور جسمانی ساخت کے باعث سوشل میڈیا صارفین کی توجہ کا مرکز بنی ہوئی ہیں، ان کی تازہ تصاویر وائرل ہونے کے بعد سوشل میڈیا پر یہ چہ مگوئیاں ہو رہی تھیں کہ انہوں نے ممکنہ طور پر فلرز یا کسی میڈیکل پروسیجر کے ذریعے اپنی شکل و جسامت میں تبدیلی کی ہے۔

اپنے حالیہ انٹرویو میں کومل میر نے ان تمام افواہوں کی سختی سے تردید کی اور واضح کیا کہ ان کا چہرہ یا جسم کسی مصنوعی طریقے سے تبدیل نہیں ہوا۔

انہوں نے بتایا کہ میں ہمیشہ کم وزن کا شکار رہی ہوں اور کھانے پینے سے متعلق مسائل کا سامنا رہا لیکن حالیہ دنوں میں خوراک میں بہتری لا کر میں نے قدرتی طور پر 6 کلو وزن بڑھایا ہے، جو خاص طور پر چہرے پر واضح ہو رہا ہے۔

کومل نے مزید انکشاف کیا کہ مجھے ایک فلم کی پیشکش ہوئی تھی جس کے لیے ہدایتکاروں نے مشورہ دیا کہ بڑی اسکرین پر بہتر نظر آنے کے لیے جسمانی طور پر صحت مند دکھائی دینا ضروری ہے، ورنہ میں اسکرین پر چھوٹی نظر آؤں گی اور اسی مشورے پر عمل کرتے ہوئے میں نے خوراک میں اضافہ کیا۔

اداکارہ کا کہنا تھا کہ اب میں خود کو پہلے سے زیادہ خوبصورت، توانا اور پراعتماد محسوس کرتی ہیں اور سوشل میڈیا پر پھیلنے والی افواہوں کو مکمل طور پر مسترد کرتی ہوں، میں اب اپنی زندگی دوسروں کی رائے کی پرواہ کیے بغیر اپنی مرضی سے گزار رہی ہوں۔