ملک میں جاری شدید بارشوں اور سیلابی صورتحال سے ہونے والی تباہی پر پاکستان کی معروف شوبز شخصیات نے سوشل میڈیا کے ذریعے شدید افسوس کا اظہار کیا اور عوام سے متاثرین کی مدد کی اپیل کی۔

گلوکار عاصم اظہر نے اپنے پیغام میں لکھا کہ آج ہماری زمین رو رہی ہے، سیلاب نے خواب، گھر اور زندگیاں چھین لیں۔ ہمیں ایک قوم بن کر ایک دوسرے کا سہارا دینا ہوگا۔

اداکارہ اور ماڈل نادیہ حسین نے مختصر مگر پُراثر دعا کی کہ یا اللہ! ہمارے ملک کو مزید آفات سے بچا۔

دوسری جانب گلوکار عمیر جسوال نے بھی سیاحوں سے اپیل کرتے ہوئے کہا کہ براہِ کرم شمالی علاقوں کا سفر نہ کریں تاکہ ریسکیو آپریشن متاثر نہ ہو۔

مصنفہ فاطمہ بھٹو نے امدادی اقدامات پر سوال اٹھاتے ہوئے کہا  کہ متاثرین تک بروقت مدد کیوں نہیں پہنچ رہی؟ یہ ایک سنگین انسانی المیہ ہے جس پر فوری اور مؤثر ردِعمل کی ضرورت ہے۔

واضح رہے کہ پاکستان کے شمالی پہاڑی علاقے اس ہفتے شدید بارشوں اور تباہ کن لینڈ سلائیڈز کی لپیٹ میں آ گئے، جنہوں نے انسانی زندگی، انفرااسٹرکچر اور قدرتی ماحول کو شدید نقصان پہنچایا، صرف 48 گھنٹوں کے دوران 350 سے زائد قیمتی جانیں ضائع ہو گئیں۔

خیبرپختونخوا، گلگت بلتستان اور آزاد کشمیر سب سے زیادہ متاثر ہوئے، جہاں ندی نالے طوفانی دریا بن گئے، پل ٹوٹ گئے، سڑکیں بہہ گئیں اور کئی بستیاں مٹی اور پانی میں دفن ہو گئیں۔

متاثرہ اضلاع میں بونیر، سوات، مانسہرہ اور دیگر دور دراز وادیاں شامل ہیں جہاں ریسکیو ٹیموں کو شدید مشکلات کا سامنا ہے۔

ریسکیو حکام کا کہنا ہے کہ کئی علاقوں تک زمینی راستے مکمل طور پر منقطع ہو چکے ہیں، جس سے امدادی سرگرمیوں میں تاخیر ہو رہی ہے۔