نیشنل سائبر کرائم انویسٹی گیشن ایجنسی (این سی سی آئی اے) نے معروف یوٹیوبر سعد الرحمان المعروف ڈکی بھائی کے خلاف منی لانڈرنگ اور آن لائن جوا فروغ دینے کے الزامات میں مقدمہ درج کر لیا ہے۔

ذرائع کے مطابق ڈکی بھائی کو گزشتہ شب لاہور ایئرپورٹ پر بیرون ملک روانگی کی کوشش کے دوران حراست میں لیا گیا۔

 ایجنسی کا کہنا ہے کہ ملزم کا نام پہلے ہی پی این آئی ایل (پاسنجر نام ریکارڈ) لسٹ میں شامل تھا۔

ایف آئی آر کے مطابق ڈکی بھائی پر سوشل میڈیا پلیٹ فارمز کے ذریعے آن لائن جوئے کی ایپس کو فروغ دینے، عوام کو غیر قانونی سرمایہ کاری میں ملوث کرنے اور منی لانڈرنگ جیسے سنگین الزامات عائد کیے گئے ہیں۔

این سی سی آئی اے کے مطابق ملزم سے موبائل فون، مشکوک واٹس ایپ نمبرز اور دیگر ڈیجیٹل شواہد حاصل کیے گئے ہیں۔

ابتدائی تفتیش میں غیر قانونی ادائیگیوں کے ثبوت بھی برآمد ہو چکے ہیں۔ تحقیقات کا دائرہ کار وسیع کر دیا گیا ہے اور ملزم کے اثاثوں کی چھان بین جاری ہے۔

واضح رہے کہ یہ پہلا موقع نہیں جب ڈکی بھائی قانونی مسائل کا شکار ہوئے ہوں، رواں سال اپریل میں بھی ان کے خلاف موٹروے پر خطرناک ڈرائیونگ اور اسٹیئرنگ پر پاؤں رکھ کر گاڑی چلانے جیسے اسٹنٹس پر 2 مقدمات درج کیے گئے تھے۔

ان پر الزام تھا کہ انہوں نے گاڑی کو 200 کلومیٹر فی گھنٹہ کی رفتار سے چلایا، جو خطرناک اور قانون کے منافی عمل ہے۔

ان مقدمات میں ڈکی بھائی نے ضمانت حاصل کر کے خود کو گرفتاری سے بچا لیا تھا، تاہم حالیہ الزامات مزید سنگین نوعیت کے ہیں۔