پاکستانی ڈرامہ انڈسٹری کے لیجنڈری اداکار عابد علی کی چھٹی برسی آج عقیدت و احترام کے ساتھ منائی جا رہی ہے۔

مارچ 1952ء میں کوئٹہ میں پیدا ہونے والے عابد علی نے ریڈیو پاکستان سے اپنے فنی سفر کا آغاز کیا اور بعد ازاں 1973ء میں پاکستان ٹیلی ویژن سے منسلک ہو کر “جھوک سیال” جیسے ڈرامے میں اپنی اداکاری کے جوہر دکھائے۔

انہیں اصل شہرت امجد اسلام امجد کے تحریر کردہ مشہور ڈرامہ “وارث” سے حاصل ہوئی، جو آج بھی کلاسک ڈراموں میں شمار ہوتا ہے۔

ان کے دیگر مشہور ڈراموں میں پیاس، دوریاں، مہندی، دیار دل سمیت کئی شاہکار شامل ہیں جنہوں نے عابد علی کو مداحوں کے دلوں کا بادشاہ بنا دیا۔

عابد علی نے نہ صرف اداکاری میں نام کمایا بلکہ 1993ء میں ڈرامہ “دشت” سے ہدایت کاری کے میدان میں بھی کامیابی حاصل کی۔

انہیں ان کی شاندار فنی خدمات کے اعتراف میں 1985ء میں “پرائیڈ آف پرفارمنس” سمیت متعدد قومی اعزازات سے نوازا گیا۔

عابد علی نے دو شادیاں کیں، پہلی بیوی حمیرا علی سے ان کی تین بیٹیاں ایمان علی، راحمہ علی اور مریم علی ہیں۔ بعد ازاں انہوں نے 2006ء میں اداکارہ رابعہ نورین سے دوسری شادی کی۔

عابد علی جگر کے سرطان میں مبتلا تھے اور 30 اگست 2019 کو سانس کی تکلیف کے باعث کراچی کے نجی اسپتال میں داخل کیے گئے، جہاں وہ 5 ستمبر 2019 کو انتقال کر گئے۔