اسلام آباد کی مقامی عدالت نے ٹک ٹاکر سامعہ حجاب کے مبینہ اغوا کے مقدمے میں نامزد ملزم حسن زاہد کی ایک کیس میں ضمانت منظور کر لی ہے۔

ایڈیشنل ڈسٹرکٹ اینڈ سیشن جج عامر ضیا نے کیس کی سماعت کے دوران ملزم کے وکیل کے دلائل سننے کے بعد 20 ہزار روپے کے مچلکوں کے عوض ضمانت منظور کی۔

وکیل کا مؤقف تھا کہ ان کے مؤکل پر جھوٹا مقدمہ درج کیا گیا ہے، جس کا مقصد صرف ہراساں اور بلیک میل کرنا ہے۔

عدالت نے ملزم کی قبل از گرفتاری ضمانت کی درخواست پر بھی سماعت مقرر کرتے ہوئے 9 ستمبر کو فریقین سے دلائل طلب کر لیے ہیں، تاہم حسن زاہد ایک دوسرے مقدمے میں 5 روزہ جسمانی ریمانڈ پر اس وقت پولیس کی تحویل میں ہیں۔

یاد رہے کہ حالیہ دنوں میں سوشل میڈیا پر وائرل ہونے والے ویڈیو بیان میں معروف ٹک ٹاکر سامعہ حجاب نے دعویٰ کیا تھا کہ انہیں اغوا کرنے کی کوشش کی گئی۔

سامعہ نے سی سی ٹی وی فوٹیج اور مبینہ ملزم کی تصویر خود انسٹاگرام پر شیئر کی تھی، تاہم اپنے بیان میں ٹک ٹاکر کا کہنا تھا کہ ملزم کئی دنوں سے انہیں ہراساں کر رہا ہے اور شادی کی پیشکش کر رہا ہے۔

انہوں نے ماضی کی ایک المناک مثال دیتے ہوئے کہا کہ “میری دوست ثنا یوسف کو بھی ‘نا’ کہنے پر جان سے مارا گیا تھا، میری زندگی کو بھی خطرہ ہے۔”

ٹک ٹاکر نے پولیس اور اعلیٰ حکام سے اپیل کی ہے کہ ان کی جان کو لاحق خطرے کے پیش نظر فوری کارروائی کی جائے اور انہیں تحفظ فراہم کیا جائے۔