نیشنل سائبر کرائم انویسٹی گیشن ایجنسی (این سی سی آئی اے) نے معروف یوٹیوبر رجب بٹ کو 9 ستمبر کو طلب کر لیا ہے۔

یہ طلبی آن لائن ٹریڈنگ اور جوئے سے متعلق موبائل ایپلیکیشنز کی مبینہ تشہیر اور مالی فراڈ کے الزامات کے تحت عمل میں لائی گئی ہے۔

ایجنسی کی جانب سے جاری کردہ نوٹس میں کہا گیا ہے کہ رجب بٹ نے سوشل میڈیا پلیٹ فارمز کے ذریعے نوجوانوں کو جوئے سے منسلک ایپس میں سرمایہ کاری کی ترغیب دی، جس کے نتیجے میں متعدد افراد مالی نقصان کا شکار ہوئے۔

 مزید دعویٰ کیا گیا ہے کہ وہ ایک منظم اسکیم کے ذریعے شہریوں کی محنت سے کمائی گئی رقم کو نقصان پہنچانے میں ملوث رہے ہیں۔

تحقیقات کے دوران رجب بٹ کے مبینہ مالی گھپلوں کے شواہد بھی سامنے آئے ہیں۔ انہیں ہدایت کی گئی ہے کہ وہ 9 ستمبر بروز منگل صبح 11 بجے این سی سی آئی اے لاہور آفس میں اسسٹنٹ ڈائریکٹر شعیب ریاض کے روبرو پیش ہو کر اپنا مؤقف پیش کریں۔

نوٹس میں واضح کیا گیا ہے کہ غیر حاضری کی صورت میں یہ سمجھا جائے گا کہ ان کے پاس دفاع کے لیے کچھ نہیں ہے۔

رجب بٹ کی نمائندگی کرنے والے وکیل بیرسٹر میاں علی اشفاق نے میڈیا کو بتایا کہ ان کی لا فرم اس کیس میں قانونی معاونت فراہم کر رہی ہے اور یوٹیوبر کی جانب سے باقاعدہ تحریری جواب بھی جمع کرایا جائے گا۔

ان کا کہنا تھا کہ معاملے کے تمام قانونی پہلوؤں کا بغور جائزہ لیا جا رہا ہے اور ان کے مؤکل کو آئین و قانون کے مطابق مکمل دفاع فراہم کیا جائے گا۔