اسلام آباد: حکام نے معروف یوٹیوبر سعد الرحمان المعروف ڈکی بھائی کے خلاف جاری آن لائن جوا بازی کی تشہیر سے متعلق تحقیقات کے دوران بھاری رقوم ضبط کرلی ہیں۔

بدھ کو جاری تفصیلات کے مطابق ڈکی بھائی کے دبئی اکاؤنٹس سے 6 لاکھ درہم، مقامی بینک اکاؤنٹس سے 15 کروڑ روپے اور ڈیجیٹل والٹس سے 3 لاکھ 25 ہزار روپے برآمد ہوئے ہیں، جنہیں مزید قانونی کارروائی تک سرکاری خزانے میں منتقل کردیا گیا ہے۔

سینئر صحافی کی رپورٹ کے مطابق تفتیشی ٹیموں نے ملزم کے موبائل ڈیوائسز سے چیٹ لاگز اور ادائیگیوں کے ریکارڈ بھی حاصل کیے ہیں جو غیر رجسٹرڈ جوا ایپس کی براہِ راست تشہیر اور مالی لین دین کا ثبوت فراہم کرتے ہیں۔

ان کے بقول، واٹس ایپ میسجز اور ادائیگیوں کی ہسٹری سے یہ ثابت ہوتا ہے کہ سوشل میڈیا چینلز کے ذریعے اس کام کو مربوط انداز میں چلایا گیا۔

نیشنل سائبر کرائم انویسٹی گیشن اتھارٹی کے ترجمان نے تصدیق کی کہ کیس ان افراد کے خلاف ہے جنہوں نے غیر قانونی آن لائن گیمبلنگ پلیٹ فارمز کو فروغ دے کر کمایا۔

ترجمان کے مطابق ڈکی بھائی کے یوٹیوب چینل سے بھی تشہیری مواد ملا ہے جب کہ مالی لین دین اور ایپ آپریٹرز کے ساتھ رابطوں کا ریکارڈ بھی ثبوت کے طور پر حاصل کرلیا گیا ہے۔

ترجمان نے بتایا کہ ضبط شدہ رقم کو منجمد کردیا گیا ہے اور عدالت میں شواہد کا مکمل ریکارڈ پیش کیا جائے گا۔ فی الحال ڈکی بھائی پولیس حراست میں ہیں جب کہ پراسیکیوٹرز نے تحقیقات کا دائرہ وسیع کر دیا ہے۔

اس دوران دیگر شخصیات، بشمول اقراء کنول اور مدثر حسین کو بھی تحقیقات میں شامل کرلیا گیا ہے جن پر مبینہ طور پر اس نیٹ ورک سے تعلق رکھنے کا شبہ ہے۔

قانونی ماہرین کا کہنا ہے کہ کیس میں اثاثہ جات کی ٹریسنگ، دبئی میں موجود رقوم کے لیے بین الاقوامی معاونت اور ڈیجیٹل والٹس کی فارنزک جانچ شامل ہوگی۔ ڈکی بھائی کو غیر قانونی جوا بازی کی تشہیر اور صارفین کو نقصان پہنچانے کے الزامات کا سامنا ہے۔

حکام کے مطابق تحقیقات مکمل ہونے کے بعد اینٹی منی لانڈرنگ اور سائبر کرائم قوانین کے تحت مقدمہ چلایا جائے گا اور ناجائز اثاثوں کی وصولی بھی یقینی بنائی جائے گی۔