پاکستان کے معروف اداکار گوہر رشید نے انکشاف کیا ہے کہ ان کی شریکِ حیات کبریٰ خان نے ابتدائی طور پر ان کی شادی کی پیشکش قبول نہیں کی تھی، تاہم انہوں نے ہمت نہیں ہاری اور بالآخر کبریٰ خان نے ہاں کہہ دی۔

حال ہی میں ایک انٹرویو میں گوہر رشید نے بتایا کہ وہ اور کبریٰ خان شروع میں صرف اچھے دوست تھے اور ان کے درمیان کوئی رومانوی تعلق نہیں تھا، مگر وقت کے ساتھ یہ دوستی محبت میں بدل گئی۔

انہوں نے کہا کہ ان کی خواہش ہمیشہ سے مکہ میں نکاح کرنے کی تھی اور خوش قسمتی سے کبریٰ خان کی بھی یہی خواہش تھی۔ قسمت نے ساتھ دیا اور ان کا نکاح مقدس سرزمین مکہ میں ہی انجام پایا۔

گوہر رشید نے مسکراتے ہوئے بتایا کہ محبت کا آغاز ان کی طرف سے ہوا تھا، شروع ہی سے وہ کبریٰ خان کی طرف مائل تھے لیکن دوست ہونے کے باعث اس رشتے کو اس زاویے سے کبھی نہیں سوچا۔

ان کا کہنا تھا کہ دوستی پر مبنی شادی ایک بڑی نعمت ہے، کیونکہ اس میں اعتماد اور سمجھ بوجھ پہلے سے قائم ہوتی ہے۔

نوجوانوں کو مشورہ دیتے ہوئے گوہر رشید نے کہا کہ شادی سے قبل اپنی دنیاوی خواہشات پوری کرنی چاہئیں، کیونکہ شادی ایک روحانی اور ذمہ داریوں سے بھرا رشتہ ہے۔

انہوں نے مزید کہا کہ بیوی کو تحفے دینا اچھی بات ہے مگر سب سے بڑا تحفہ تحفظ اور آزادی ہے، تاکہ وہ خود کو محفوظ اور بااعتماد محسوس کرے۔

گوہر رشید کے مطابق کبریٰ خان ان کی زندگی کی سب سے بڑی نعمت ہیں اور وہ اس رشتے کے لیے بے حد شکر گزار ہیں۔