مشہور امریکی گلوکارہ ٹیلر سوئفٹ اور نیشنل فٹبال لیگ (این ایف ایل) اسٹار ٹریوس کیلسی کی ممکنہ شادی کی تاریخ اور مقام سے متعلق اطلاعات نے مداحوں کو جوش و تجسس میں مبتلا کر دیا ہے۔

غیر ملکی میڈیا رپورٹس کے مطابق دونوں کی شادی 13 جون 2026 کو متوقع ہے، یہ تاریخ ٹیلر سوئفٹ کے لیے خاص اہمیت رکھتی ہے کیونکہ وہ نمبر 13 کو اپنی خوش نصیبی کی علامت سمجھتی ہیں، اس باعث قیاس آرائیاں مزید زور پکڑ گئی ہیں۔

ذرائع کے مطابق شادی کی تقریب امریکی ریاست رہوڈ آئی لینڈ کے ساحلی علاقے واچ ہل، ویسٹرلی میں ٹیلر سوئفٹ کی سمندری رہائش گاہ کے قریب منعقد ہونے کا امکان ہے۔

مداحوں کے اندازوں کے مطابق 2 مقامات فی الحال سرفہرست ہیں جن میں بریکرز مینشن نیوپورٹ میں واقع 70 کمروں پر مشتمل تاریخی محل، جسے کورنیلیئس وینڈر بلٹ دوم نے تعمیر کرایا تھا اور جس کی مالیت تقریباً 500 ملین ڈالر ہے جبکہ دوسرا اوشیئن ہاؤس ٹیلر کے گھر کے قریب ایک شاندار ساحلی ہوٹل، جو تقریب کے لیے ممکنہ متبادل مقام سمجھا جا رہا ہے۔

یاد رہے کہ ٹیلر سوئفٹ اور ٹریوس کیلسی نے 26 اگست 2025 کو انسٹاگرام پر مشترکہ پوسٹ کے ذریعے منگنی کا اعلان کیا تھا۔

اس پوسٹ میں ان کی خوابناک منگنی کی تصاویر بھی شیئر کی گئیں، جن میں بتایا گیا کہ ٹریوس نے ٹیلر کو اس وقت پروپوز کیا جب وہ اپنے نئے البم کے اعلان کے سلسلے میں نیو ہائٹس پوڈکاسٹ پر موجود تھیں جس کے میزبان خود ٹریوس اور ان کے بھائی جیسن کیلسی ہیں۔

ٹیلر سوئفٹ نے اس موقع پر اپنی ونٹیج اسٹائل کی ڈائمنڈ رنگ بھی مداحوں کو دکھائی، جو سوشل میڈیا پر موضوعِ بحث بنی رہی۔