پاکستان کی معروف اداکارہ سجل علی کا اپنے سابق شوہر احد رضا میر کو ایکس (سابق ٹوئٹر) پر دوبارہ فالو کرنے کا معاملہ سوشل میڈیا پر وائرل ہو گیا ہے، جس کے بعد مداحوں میں چہ مگوئیاں اور قیاس آرائیاں شروع ہو گئی ہیں۔

سوشل میڈیا پر دعویٰ کیا جا رہا ہے کہ سجل علی نے احد رضا میر کو دوبارہ فالو کیا ہے، جو ان کی طلاق کے بعد ایک غیر متوقع قدم تصور کیا جا رہا ہے۔

کچھ مداح اس پیشرفت کو دونوں کے درمیان ’دوستی کی بحالی‘  قرار دے رہے ہیں جبکہ کچھ شائقین ماضی کی مقبول جوڑی کے دوبارہ قریب آنے کی امید ظاہر کر رہے ہیں۔

تاہم متعدد صارفین کا کہنا ہے کہ جس اکاؤنٹ سے فالو کیا گیا، وہ جعلی یا غیر تصدیق شدہ معلوم ہوتا ہے۔

یاد رہے کہ سجل علی اور احد رضا میر نے 2017 کے مقبول ڈرامے ’یقین کا سفر‘ میں ایک ساتھ کام کیا، جس میں ان کی آن اسکرین کیمسٹری کو بے حد پسند کیا گیا۔

یہ تعلق حقیقی زندگی میں بھی مضبوط ہوا اور دونوں نے جون 2019 میں منگنی جبکہ مارچ 2020 میں ابوظہبی میں شادی کی، تاہم دو سال بعد ان کے درمیان علیحدگی ہوگئی، جس پر دونوں کی جانب سے آج تک کوئی باضابطہ بیان سامنے نہیں آیا۔

دلچسپ امر یہ ہے کہ علیحدگی کے باوجود سجل علی کے احد کے خاندان سے پیشہ ورانہ تعلقات برقرار ہیں اور وہ اس وقت احد کے والد اور سینئر اداکار آصف رضا میر کے ساتھ ڈرامہ ’میں منٹو نہیں ہوں‘ میں کام کررہی ہیں۔