عالمی  ادارہ  صحت  کی جانب سے  آج دنیا بھر میں   ریبیز ڈے یا سگ گذیدگی  کا دن  منایا جارہا ہے ۔

 اس دن کو منانے کا مقصد ہر سال کتے کے کاٹنے سے  لگنے والی  بیماری کی  روک  تھام  کے  بارے  میں  شعور بیدار کرنے  اور اس  خوفناک بیماری  کو شکست  دینے  کے لئے احتیاطی  تدابیر  کے بارے  میں  آگاہی  فراہم کرنا ہوتا ہے۔

پاکستان کو سالانہ 10 لاکھ اینٹی ریبیز ویکسین کی ضرورت ہوتی ہے جس کا صرف 7 فیصد ملکی سطح پر تیار کیا جاتا ہے پاکستان  میں ریبیز کی ویکسین   کی کمی ہونے  کی وجہ سے ہر سال 5  ہزار  افراد   کی  ذندگیاں   ختم ہوجاتی  ہیں۔

 سندھ بھر میں   آوارہ  کتوں  کے کاٹنے  کے واقعات  میں  دن بدن اضافہ  ہو رہا ہے  ۔  جبکہ  ہیلتھ  ڈیپارٹمنٹ  کی جانب سے  بار بار  آگاہ  کیے جانے کےباوجود ویکسین کی کمی  اور احتیاطی  تدابیر نہ  ہونے کی وجہ سے خطرناک حد تک اضافہ  قابل تشویش ہے۔

رواں  ماہ ستمبر میں  جناح  ہسپتال کی  جانب سے ریبیز کے مریضوں کی  رپورٹ  جاری کی گئی ہے. جناح ہسپتال کی جانب سے جاری کردہ رپورٹس کے مطابق ہسپتال میں سندھ بھر میں ریبیزکے مریضوں کی تعداد میں اضافہ ہوا ہے۔

ہسپتال انتظامیہ کے مطابق سندھ میں کتوں کے کاٹنے سے 9 ماہ کے دوران جناح اسپتال کراچی میں 7 ہزار 741 کیسز رپورٹ ہوئے ہیں۔

 کتوں کے کاٹنے کاشکارافراد میں 6 ہزار 779 مرد جبکہ 962 خواتین شامل ہیں ۔

رپورٹ کے مطابق جنوری میں 760، فروری میں 918، مارچ میں 1180، اپریل میں 1049، مئی میں 836، جون میں 768، جولائی میں 855، اگست میں 804، ستمبر میں 571 میں کتوں کے کاٹنے کے کیسزرپورٹ ہوئے ہیں۔

دوسری جانب محکمہ صحت سندھ نے بھی  ابتدائی 5 ماہ  کی  رپورٹ  جاری کی ہے ۔

 محکمہ سندھ  کی    جانب سے جاری کردہ اعداد وشمار کے مطابق رواں برس کے پہلے پانچ ماہ میں 69 ہزار سے زیادہ کتے کے کاٹے کے کیسز رپورٹ ہوئے جن میں سب سے زیادہ واقعات لاڑکانہ اور سب سے کم کراچی ڈویژن میں رپورٹ ہوئے ہیں۔

لاڑکانہ ڈویژن میں کتے کاٹے کے کیسز کی تعداد 22 ہزار 822 ہے، حیدرآباد ڈویژن میں لگ بھگ 21 ہزار، شہید بینظیر آباد ڈویژن میں 12 ہزار سے زیادہ، میر پور خاص ڈویژن میں چھ ہزار 774 اور کراچی ڈویژن میں 320 واقعات پیش آئے ہیں۔

واضح رہے کہ چند سال قبل بلدیاتی اداروں نے آوارہ کتوں کو تلف کرنے کی مہم کا آغاز کیا تھا تو ایک غیر سرکاری تنظیم نے اس کے خلاف عدالت سے رجوع کیا تھا۔ اس تنطیم کا کہنا تھا کہ کتوں کو زہر دیکر مارنے کی بجائے اس کی نس بندی کی جائے۔

28 ستمبر کو ریبیز ویکیسین کے موجد فرانسیسی کیمسٹ اور مائکرو بائیوولوجسٹ لوئس پاسچر کی  برسی  بھی منائی جاتی ہے۔