ملک بھرمیں ڈینگی کےحملےجاری، پنجاب میں ڈینگی وائرس پنجاب سمیت ملک کے دیگرصوبوں سےمزیدکیسز رپورٹ ہوگئے۔

تفصیلات کے مطابق پچھلےچوبیس گھنٹوں میں پنجاب میں 131نئے مریض سامنے آئےجبکہ 151 مریض ڈسچارج ہوئے ہیں۔ راولپنڈی میں 115، لاہور میں 02، اٹک میں 03، ڈی جی خان اور چکوال سے ایک ایک کیس سامنے آیا۔

سرگودھا سے 04، گوجرانوالہ لیہ ،مظفرگڑھ،ٹوبہ اور شیخوپورہ سے ایک ایک کیس سامنے آیا۔اس وقت پنجاب بھرمیں زیرعلاج مریضوں میں سے 08 مریض انتہائی نگہداشت میں جبکہ باقی خطرے سے باہر ہیں۔

ڈینگی ایکسپرٹ ایڈوائزری گروپ کے مطابق پنجاب میں رواں سال یکم جنوری سے 14اکتوبر تک ڈینگی سے 10اموات ہوئی ہیں۔

 گذشتہ روز محکمہ صحت کی ٹیموں نے پنجاب بھر میں ایک لاکھ 62ہزار 316ان ڈور اور 37ہزار 89آوٹ ڈور مقامات کو چیک کیا جبکہ1208مقامات سے لاروا کوتلف کیا۔

پنجاب بھر سے ڈینگی لاروا کی موجودگی اور غفلت برتنے پر 61 کمرشل مقامات کے خلاف مقدمات درج جبکہ 20 افراد کو گرفتار کیا گیا ہے۔ ڈینگی لاروا کی موجودگی پر 732افراد کو وارننگ جاری کی گئی۔ راولپنڈی میں اس وقت 05 موبائل ہیلتھ یونٹس کام کررہے ہیں۔

راولپنڈی میں گزشتہ 24 گھنٹوں میں مزید114 شہری ڈینگی کا نشانہ بنے۔

ذرائع محکمہ صحت کے مطابق پنجاب میں اب تک 6377شہری ڈینگی کا نشانہ بن چکے۔

راولپنڈی میں ڈینگی اب تک 26 قیمتی جانیں لے چکا ہے۔ راولپنڈی کے اسپتالوں میں ڈینگی مریضوں کی آمد جاری ہے۔

ذرائع محکمہ صحت کاکہناہے کہ گزشتہ 24 گھنٹوں میں پوٹھوہار ٹائون سے مزید47 افراد ڈینگی کانشانہ بن گئے۔ شہراور کینٹ سے مزید 45 افرادڈینگی کا شکارہوئے۔

ذرائع محکمہ صحت کا کہناہے کہ درجہ حرارت گرنے تک ڈینگی کا خطرہ برقرار رہے گا۔

دوسری جانب سندھ میں بھی ڈینگی وائرس قابو نہ آسکا۔کراچی میں ڈینگی وائرس سے ایک اور ہلاکت سامنے آگئی۔جس میں اجمیر نگری کی رہائشی خاتون ڈینگی کے باعث نجی اسپتال میں دم توڑ گئیں۔ ڈینگی سے ایک ہی خاندان کے 3 افراد متاثر ہوئے تھے دو افراد اب بھی نجی اسپتال میں داخل ہیں۔ کراچی میں ڈینگی سے ہلاکتوں کی تعداد 17 ہوگئی۔

خیبرپختونخوا میں گزشتہ 24 گھنٹوں کے دوران مزید 44افرادمیں ڈینگی وائرس کی تصدیق ہوگئی۔صوبہ  میں ڈینگی سے متاثرہ افراد کی تعداد 5229ہوگئی۔

ڈینگی رسپانس یونٹ کے مطابق پشاور میں بھی مزید 12افراد ڈینگی کا شکار ہوئے۔ پشاور میں ڈینگی کے مریضوں کی تعداد بڑھ کر 2190ہوگئی ہے۔

ڈینگی رسپانس یونٹ کا کہناہے کہ صوبے کے اسپتالوں میں تاحال 157 مریض زیرعلاج ہیں جہاں علاج کے بعد 5073مریضوں کو فارغ کیا جاچکا ہے۔