ملک بھر میں ڈینگی کے وار کم نہ ہوئے۔رواں سال مریضوں کی تعداد 31 ہزار سے تجاوز کر گئی ہے۔

تفصیلات کے مطابق ملک میں ڈینگی پر قابو نہ پایا جا سکا۔ مختلف شہروں میں ڈینگی مچھر کے وار جاری ہیں ۔

اعدادو شمار کے مطابق رواں سال کیسز کی تعداد 31 ہزار سے تجاوز کر گئی ہے۔ وائرس نے کئی معصوم شہریوں کی زندگی بھی چھین لی ہے۔

پنجاب میں ڈینگی بے لگام ہے۔چوبیس گھنٹوں کے دوران 165 افراد بخار میں مبتلا ہو گئے ہیں۔ وفاقی دارالحکومت اسلام آباد میں ایک ہفتے کے دوران 2 ہزارسات سو سے زائدکیسزرپورٹ ہوئے۔ مریضوں کی تعداد 9 ہزار ہو گئی ہے۔راولپنڈی میں 124 کیسز سامنے آئے۔فیصل آباد کےالائیڈاسپتال میں 2 اورملتان کےنشتر اسپتال میں 4 مریضوں میں مہلک مرض کی تصدیق ہوگئی ہے۔صوبے میں رواں سال قاتل مچھر10 جانیں لے چکاہے۔

خیبرپختونخوا کی بات کی جائے تو وہاں بھی حالات کچھ مختلف نہیں۔خیبرپختونخوا میں بھی ڈینگی نے پنجے گاڑے ہوئے ہیں ۔ گزشتہ 24گھنٹوں کے دوران 95 نئے کیسز رپورٹ ہوئے ہیں ۔سرکاری اعدادوشمار کے مطابق صوبے میں مریضوں کی تعداد 5 ہزار سےبڑھ گئی ہے۔

سندھ میں 24 گھنٹوں کے دوران 190 مزید شہری ڈینگی کا شکار ہوگئے ہیں۔ 24 گھنٹوں میں کراچی سے 176 شہری ڈینگی کا شکار ہوئے جبکہ سندھ کے دیگر اضلاع سے 14 کیسز رپورٹ ہوئے ۔رواں ماہ میں صوبے بھر سے 2 ہزار 6 سو 95 شہری ڈینگی کا شکار ہوئے۔ رواں سال صوبے بھر میں ڈینگی کا شکار ہونے والے شہریوں کی تعداد 5 ہزار 9 سو سے تجاوز کر گئی ہے۔

کراچی سے رواں سال 5 ہزار 5 سو 52 جبکہ سندھ کے دیگر اضلاع سے 360 شہری ڈینگی کا شکار ہو چکے ہیں ۔رواں سال ڈینگی سے 18 ہلاکتیں ہو چکی ہے۔گزشتہ سال 2088 شہری ڈینگی سے متاثر ہوئے جن میں سے 2 جاں بحق بھی ہوئے۔ 2017 میں 2927 ڈینگی کے کیس رپورٹ ہوئے تھے جن میں سے 12 جاں بحق ہوئے تھے۔