کراچی والوں کیلئےایک کے بعد ایک مشکل،پہلے ڈینگی نے جینا دوبھرکیا اوراب نگلیریا وائرس جان کا دشمن بن گیا ہے ۔

کراچی میں نگلیریا وائرس  کا ایک اورمریض دم توڑ گیا ۔  انیس سالہ حمید اللہ جناح ہسپتال میں زندگی کی بازی ہار گیا۔

کراچی کے ایگزیکٹو ڈائریکٹر جناح اسپتال ڈاکٹر سیمی جمالی نے کہا ہے کہ اسپتال میں زیرِ علاج نگلیریا کا مریض انتقال کر گیا ہے۔

ایم ایس جناح اسپتال ڈاکٹر سیمی جمالی کا کہنا  تھا کہ مریض کو تیز بخار کی حالت میں جے پی ایم سی لایا گیا تھااور مریض  کی حالت کافی تشویشناک تھی ۔ جسے آئی سی یو میں رکھا گیا تھا تاہم وہ  جانبرنہ ہوسکا ۔

حمید اللہ  کی موت کے بعد رواں برس  شہر میں مہلک وائرس سے جاں بحق ہونے والے افراد کی تعداد 15 تک جا پہنچی ہے ۔۔

جب کہ جناح  ہسپتال میں نگلیریا کا پہلا کیس رواں سال 18  اپریل  کو اسپتال لایا گیا تھا ۔جہاں اورنگی ٹاون سے تعلق رکھنے والا 21  سالہ انیس اسلم  دوروز بعد دم توڑ گیا تھا۔

 نگلیریا ایک ایسا امیبا ہے، جو اگر ناک کے ذریعے دماغ میں داخل ہوجائے تو دماغ کو پوری طرح چاٹ جاتا ہے، جس سے انسان کی موت واقع ہوجاتی ہے، یہ عموماً گرم پانی میں تیزی سے پرورش پاتا ہے۔

یہ وائرس عموماً سوئمنگ پولز، تالاب سمیت ٹینکوں میں موجود ایسے پانی میں پیدا ہوتا ہے، جس میں کلورین کی مقدار کم ہوتی ہے، شدید گرمی بھی نگلیریا کی افزائش کا سبب بنتی ہے۔