کراچی میں ایک ہی دن کے دوران ڈینگی کے مزید 144 نئے کیسز سامنے آگئے ہیں۔

تفصیلات کے مطا بق کراچی میں چو بیس گھنٹوں کے دوران  ڈینگی کے 144 نئے کیسز سامنے آگئے جس کے بعد صرف کراچی میں ڈینگی سے متاثرہ افراد کی کل تعداد 2 ہزار سے تجاوز کرچکی ہے۔

ڈینگی سرویلنس سیل کے مطابق ایک ہی دن میں 144 نئے کیس سامنے آئے،ماہ اکتوبر میں کراچی میں متاثرہ افراد کی تعداد 2 ہزار 140 تک پہنچ گئی ہے، رواں سال صرف کراچی میں 5 ہزار 183 جبکہ مجموعی طور پر سندھ میں 5 ہزار 518 افراد ڈینگی سے متاثر ہوئے۔

ڈینگی سرویلنس سیل کے مطابق سندھ میں ڈینگی سے اموات کی تعداد 18 ہوچکی ہے جبکہ گزشتہ روز وزارت صحت کی جاری کردہ رپورٹ میں بتایا گیا تھا کہ ملک بھر میں ڈینگی کیسز کی کل تعداد 30 ہزار سے تجاوز کر گئی ہے۔

ذرائع کے مطابق اب تک وفاقی دارالحکومت اسلام آباد میں ڈینگی کے 8 ہزار 245 کیس سامنے آئے، پنجاب میں 6 ہزار 629، سندھ میں 5 ہزار 109، پختنوخواہ میں 5 ہزار 229، قبائلی اضلاع میں 463، بلوچستان میں 2 ہزار 776 اور آزاد کشمیر میں 13 سو 38 ڈینگی کیس رپورٹ ہوئے ہیں۔

ذرائع کا کہنا ہے رواں برس گلگت بلتستان سے کوئی ڈینگی کیس سامنے نہیں آیا۔

وزارت صحت کا کہنا ہے کہ اب تک اسلام آباد میں ڈینگی سے 16 اموات ہو چکی ہیں، اسی طرح پنجاب میں 10، بلوچستان میں 3 اور آزاد کشمیر میں ڈینگی سے ایک ہلاکت ہوئی جبکہ پختونخواہ اور قبائلی اضلاع میں ڈینگی سے کوئی ہلاکت رپو رٹ نہیں کی گئی۔