وفاقی کابینہ نے لوگوں کو فوری ریلیف فراہم کرنے کی غرض سے زندگی بچانے والی ادویات سمیت 89 ادویات کی قیمتوں میں 15 فیصد تک فوری کمی لانے کا فیصلہ کیا ہے۔

تفصیلات کے مطابق اسلام آباد میں کابینہ اجلاس کے فیصلوں کے بارے میں صحافیوں کو بریفنگ دیتے ہوئے صحت کے معاون خصوصی ظفر مرزا نے کہا کہ یہ قیمتیں میڈیسن پالیسی 2018ء کے تحت کم کی گئی ہیں۔

معاون خصوصی نے کہا کہ وزیراعظم نے دو ماہ کے اندر ادویات پالیسی پر نظر ثانی کی ہدایت کی ہے۔انہوں نے کہا کہ قومی ادویات پالیسی تیار کی جارہی ہے جس کے تحت ادویات سازی کے شعبے کو باضابطہ بنایا جائے گا۔

ایک سوال کے جواب میں معاون خصوصی نے کہا کہ کابینہ نے اتفاق رائے سے پاکستان مسلم لیگ نون کی رہنما مریم نواز کا نام ای سی ایل سے ہٹانے کو یکسر مسترد کیا ہے ۔

پاکستان نے بھارت سےادویات کی تجارت پرعائد پابندی ختم کردی

انہوں نے کہا کہ کابینہ کے سامنے ای سی ایل سے مختلف لوگوں کے نام ڈالنے اور ہٹانے سے متعلق چوبیس کیسز پیش کئے گئے جس نے ای سی ایل پر چار نام ڈالنے اور آٹھ نام ہٹانے کی منظوری دی جبکہ آٹھ دیگر کیسز پر فیصلہ موخر کردیا گیا۔

انہوں نے مزید کہا کہ کسی خصوصی برتائو کے بغیر پاکستان میں ایک ہی اور یکساں قانون ہونا چاہئے۔

معاون خصوصی نے میڈیا کو آگاہ کیا کہ کابینہ نے آزاد کشمیر میں ایل او سی کے قریب رہنے والے لوگوں کو سہولیات فراہم کرنے کی غرض سے خصوصی مالیاتی پیکج کی منظوری دی ہے۔ انہوں نے کہا کہ 33 ہزار سے زائد خاندان جو ایل او سی پر بھارتی فائرنگ کا براہ راست شکار ہیں انہیں اس پیکج کے تحت سہ ماہی بنیادوں پر فی خاندان پانچ ہزار روپے دیئے جائیں گے۔

انہوں نے کہا کہ کابینہ نے عالمی ادارہ صحت کی سفارش پر بھارت سے پولیو فنگر مارکر کی ایک بار درآمد کی منظوری دی ہے۔

 ڈاکٹر فردوس عاشق اعوان نے کہا کہ ٹیکس اصلاحات کی بھی کابینہ نے منظوری دی ہے اور وزیراعظم نے عوام کو سہولیات بہم پہنچانے کیلئے عوام دوست لائحہ عمل تیار کرنے کیلئے ایف بی آر کو ہدایت کی ہے۔