صوبہ سندھ، پنجاب اور گلگت بلتستان میں کورونا وائرس کے مزید 152 کیسز کی تصدیق ہوئی ہے جس کے بعد ملک بھر میں متاثرہ افراد کی تعداد 1965 ہوگئی ہے ۔
تفصیلات کے مطابق آج صوبہ سندھ، پنجاب اور گلگت بلتستان میں کورونا وائرس کے مزید 152 کیسز سامنے آچکے ہیں جن میں سے 18 مریض پنجاب ،110 سندھ جبکہ گلگت بلتستان میں 24 مریض سامنے آئے ہیں۔
ترجمان وزیر صحت سندھ ڈاکٹر عذرا پیچوہوکے ایک بیان کے مطابق سندھ میں کورونا وائرس کے مزید 110 کیسز سامنے آئے ہیں جس کے بعد صوبے میں کل کیسز کی تعداد 676 تک پہنچ چکی ہےجبکہ اس وقت 627 افراد زیر اعلاج ہیں ۔
ترجمان محکمہ صحت نے یہ بھی کہا کہ کراچی سے رپورٹ ہونے والے مریضوں کی مجموعی تعداد 274 ، حیدرآباد میں کل تعداد 128 ، لاڑکانہ میں 7 ، دادو اور جیک آباد میں 1، 1 جبکہ سکھر میں کل متاثرہ افراد کی تعداد 265 تک جاپہنچی ہے۔
وزیر صحت سندھ ڈاکٹر عذرا پیچوہو نے مزید کہا کہ تمام کرونا متاثرین کو صحت اصولوں کے پیش نظر آئیسولیشن اور قرنطینہ تک محدود رکھ کر اعلاج کی سہولیات دے رہے ہیں، اب تک 41 کرونا متاثرین صحتیاب ہو چکے ہیں جبکہ اب تک 8 افراد کرونا وائرس سے متاثر ہو کر ہلاک ہوچکے ہیں۔

دوسری جانب ترجمان پرائمری اینڈ سکینڈری ہیلتھ کئیر نے بھی اپنے ایک بیان میں کہا کہ پنجاب میں کوروناوائرس کے مزید 18 کیسز سامنے آگئے جس کے بعد صوبے میں کوروناوائرس سے متاثرہ افرادکی تعداد 674 تک پہنچ گئی۔
ترجمان پرائمری اینڈ سکینڈری ہیلتھ کئیر نے کہا کہ تمام کنفرمریضوں کو دیگر افراد سے الگ آئسولیشن وارڈز میں رکھا گیا ہے اور طبیعت خراب ہونے پر مریضوں کو آئسولیشن وارڈز سے ہسپتال کے ایچ ڈی یو میں شفٹ کیا جاتا ہے جبکہ مریضوں کو مکمل طبی سہولیات فراہم کی جا رہی ہے۔
ترجمان ہیلتھ کئیر نے یہ بھی کہا کہ عوام سے گزارش ہے کہ حفاظتی تدابیر اختیار کرکے خود کو محفوظ بنائیں اور گزشتہ 14 روز میں متاثرہ ممالک سے آئے افراد گھر میں آئسولیشن اختیار کریں۔
ترجمان پرائمری اینڈ سکینڈری ہیلتھ کئیر نے مزید کہا کہ متاثرہ ممالک سے آئے افراد میں آئسولیشن کے دوران علامات ظاہر ہوں تو 1033 پر رابطہ کریں، محکمہ صحت کی ریپڈ رسپانس ٹیمیں مشتبہ مریض کو ہسپتال منتقل کر کے ٹیسٹ کروایں گی۔
دریں اثناءمحکمہ اطلاعات گلگت بلتستان نے اپنے ایک بیان میں کہا کہ گلگت بلتستان میں 24 افراد میں کوروناوائرس کی تصدیق ہو ئی جس کے بعد صوبے بھر میں میں کوروناوائرس کے کل کیسز کی تعداد 172 ہوگئی ہے۔