پاکستان میں کورونا کے 3 مزید مریض سامنے آگیا جس کے بعد پاکستان میں کورونا سے متاثرہ افراد کی تعداد 19 ہوگئی ہے۔

تفصیلات کے مطابق سندھ میں کروناوائرس کے مزید 2 نئے کیس اور کوئٹہ میں 1 کیس سامنے آگئے ، جس کے بعد سندھ بھر میں کرونا وائرس کے کیسز کی تعداد15 ، کوئٹہ میں 1 جبکہ پاکستان میں وائرس سے متاثرہ مریضوں کی تعداد 19  ہوگئی ہے ۔

محکمہ صحت سندھ کی جانب سے جاری اعدادوشمار کے مطابق متاثرہ افراد میں سے ایک کا تعلق حیدر آباد اور دوسرے کا کراچی سے ہے۔

محکمہ صحت سندھ نے یہ بھی کہا کہ حیدر آباد کے شہری نے شام سے براستہ دوحہ کراچی سفر کیا تھا جبکہ کراچی کے رہائشی نے ایران سے براستہ دبئی کراچی سفر کیا تھا۔

محکمہ صحت سندھ نے مزید کہا کہ کوئٹہ میں درج ہونے والا کورونا وائرس کا پھلا کیس ایک 12 سالہ بچے کا ہے جس کا تعلق سندھ کے علاقے دادو سے ہے۔

دوسری جانب وزیر اعظم کے معاون خصوصی ڈاکٹر ظفر مرزا کی زیر صدارت ایمرجنسی کور گروپ کا اجلاس ہوا جس میں کرونا وائرس کے متعلق بدلتی ہوئی صورتحال کا جائزہ لیا گیا۔

پاکستان میں کورونا کے 8 مزید مریض ،تعداد 16 ہوگئی

اجلاس میں ڈاکٹر ظفر مرزا نے کہا کہ حکومت پاکستان کسی بھی قسم کی ایمرجنسی سے نمٹنے کے لئے مکمل تیار ہیں اور ساتھ ہی ساتھ تمام ضروری اقدامات کو یقینی بنا رہے ہیں۔

وزیر اعظم کے معاون خصوصی ڈاکٹر ظفر مرزا نے مزید کہا کہ وفاق اور صوبوں کی مربوط کوارڈینیشن سے اقدامات کیے جارہے ہیں جبکہ سرحد پار سے آنے والے مسافروں کے لئے ایک جامع پالیسی مرتب کی گئی ہے جس میں چودہ دن کا کورنٹاین کے بعد اسکریننگ بھی کی جارہی ہے۔

خیال رہے کہ گزشتہ روز کراچی میں کرونا وائرس کے ایک روز میں 8 کیسز سامنے آئے تھے۔ تازہ ترین اعدادوشمار کے مطابق سندھ میں کرونا سے متاثرہ افراد کی تعداد 13 جبکہ ملک بھر میں تعداد 16 ہو گئی تھی جن میں سے کراچی میں 13، اسلام آباد میں 2 جبکہ گلگت بلتستان سے ایک کیس کی تصدیق ہوئی تھی۔

ان مریضوں میں سے سب سے پہلے سامنے آنے والے کراچی کے یحییٰ جعفری نامی نوجوان کو صحت یابی کے بعد اسپتال سے ڈسچارج کردیا گیا ہے جب کہ باقی تمام متاثرہ افراد زیر علاج ہیں۔