ترجمان سندھ حکومت مرتضیٰ وہاب نے کہا ہے کہ سندھ میں کرونا وائرس سے متاثرہ چوتھا مریض صحت یاب ہوگیاہے ۔

تفصیلات کے مطابق ترجمان سندھ حکومت مرتضیٰ وہاب نے سماجی رابطے کی ویب سائٹ ٹویٹر پر اپنے پیغام میں کہا کہ الحمداللہ، چوتھے مریض کا صحت یاب ہونا ہمارے لیے امیدکی کرن ہے۔

4th patient of corona virus in Sindh has recovered & tested negative twice. This case is another ray of hope for us since the person was under home isolation. Alhamdolillah

— SenatorMurtaza Wahab (@murtazawahab1) March 22, 2020

اپنے پیغام میں ترجمان سندھ حکومت مرتضیٰ وہاب نے مزید کہا کہ  سندھ میں کرونا وائرس سے متاثرہ چوتھا مریض کے 2 ٹیسٹ کیےگئے، دونوں بار منفی آئے، صحت یاب ہونے والا شخص گھر میں آئیسولیشن میں تھا۔

پاکستان میں کوروناوائرس سے متاثرہ افراد کی تعداد 780 ہو گئی

واضح رہے کہ پاکستان میں کوروناوائرس کے آج 116 افراد میں مہلک وائرس کی تشخیص ہوئی جن میں سندھ سے 41 ، اسلام آباد میں 1، پنجاب میں 70 ، بلوچستان میں  4 کورونا وائرس کے کیسز کی تصدیق ہوئی  جبکہ متاثرہ مریضوں کی اعداد و شمار کے مطابق اس وقت سندھ میں 333 ،  بلوچستان میں 108 ، خیبرپختونخوا میں 31 ،اسلام آباد میں 11 ، گلگت بلتستان میں 71 ، پنجاب میں 222 اور آزاد کشمیر میں 1 مریض موجود ہے۔

یاد رہے کہ ترجمان محکمہ صحت سندھ سے جاری کردہ بیان کے مطابق سندھ میں کورونا وائرس کے مزید 41 کیسز سامنے آئے ہیں جس کے بعد صوبے میں کل کیسز کی تعداد 333 تک پہنچ چکی ہے ،کراچی میں کورونا وائرس کےمزید 18 مریض سامنےآ گئے جبکہ تفتان سے آنے والے زائرین کے لیے  سکھر میں بنائے گئے قرنطینہ مرکز میں کورونا وائرس کے مزید 23 کیسز آئے ہیں ۔

دوسری جانب ترجمان پرائمری اینڈ سکینڈری ہیلتھ کئیر نے بھی اپنے ایک بیان میں کہا کہ پنجاب میں کوروناوائرس کے مزید70  کیسزسامنے آگئے جس کے بعد صوبے میں کوروناوائرس سے متاثرہ افرادکی تعداد222تک پہنچ گئی جن میں سے 153زائرین، 36  لاہور، 1 ملتان، 2 راولپنڈی اور 3 گجرات، 3 جہلم اور گوجرانوالہ میں 4 مریضوں میں وائرس کی تصدیق ہوئی ہے ۔