پنجاب میں کورونا وائرس کا مسلسل پھیلاؤ ہیلتھ ورکرز کیلئے بڑا خطرہ بن گیا ہے جس کے بعد فرنٹ لائن ہیلتھ پروفیشنلز تیزی سے کورونا کا شکار ہونے لگے ہیں۔

تفصیلات کے مطابق صوبہ پنجاب میں ایک روز میں22 ڈاکٹر اور 11 نرسز موذی وائرس کانشانہ بن گئے اور صرف لاہور میں وائرس کا نشانہ بننے والے پروفیشنلز کی تعداد دو سو چھیانوے تک پہنچ گئی ہے۔

لاہور کے چلڈرن اسپتال میں بارہ ڈاکٹروں اور سات نرسز کی رپورٹ مثبت آگئی جس کے بعد اسپتال میں کورونا سے متاثرہ طبی عملے کی تعداد سینتالیس تک پہنچ گئی جبکہ بیس ارکان کی ٹیسٹ رپورٹ آنا ابھی باقی ہے۔

پاکستان اس وقت کورونا وبا کی انتہائی سطح کو چھو رہا ہے،شاہ محمود قریشی 

ادھرجناح اسپتال میں بھی مزید دو ڈاکٹروں اور دو نرسز میں بھی کورونا ٹیسٹ مثبٹ آگیا جس کے بعد متاثرہ عملے کی تعداد ایک سو سولہ تک پہنچ گئی۔

لیڈی ایچی سن اسپتال میں مزید تین ڈاکٹرز کورونا میں مبتلا ہوگئے جس کے بعد  کورونا سے متاثرہ ڈاکٹرز کی تعداد گیارہ تک جاپہنچی ہے۔

جنرل اسپتال میں  بھی مزید پانچ ڈاکٹر اور 2 نرسز وبا کا شکار ہوئے، جنرل اسپتال میں کورونا سے متاثرہ ہیلتھ پروفیشنلز کی تعداد 122 ہوگئی ہے۔

لاہور میں اب تک دو سوچھیانوے ڈاکٹراور  پیرامیڈیکل اسٹاف کورونا وائرس سے متاثر ہوچکے ہیں۔

یاد رہے کہ ملک میں آج  کورونا سے مزید 61 افراد انتقال کر گئے جس کے بعد اموات کی مجموعی تعداد 1790 ہوگئی جب کہ نئے کیسز سامنے آنے کے بعد مریضوں کی مجموعی تعداد 86930 تک پہنچ گئی ، کورونا کیسز میں پاکستان نے چین کو پیچھے چھوڑ دیا۔