وزیراعظم کے معاون خصوصی ڈاکٹر ظفر مرزا نے کہا ہے کہ ہیلتھ ریفارمز پی ٹی آئی حکومت کی ترجیحات میں شامل ہے۔

تفصیلات کے مطابق ہیلتھ سیکٹر کے حوالے سے اپوزیشن کی پریس کانفرنس پر معاون خصوصی برائے صحت نے جواب دیتے ہوئے کہا ہے کہ پاکستان کا کووڈ19 کے حوالے سے ریسپونس اور تیاریاں دُنیا میں بہترین رہیں ہیں اور ہم نے جلد ہی اقدامات اُٹھائے جس کی وجہ سے خطے میں ہمارا پہلا کیس تاخیر سے 26 فروری کو رپورٹ ہوا تھا۔

معاون خصوصی نے کہا کہ دنیا بھر میں کیسز میں پھیلاؤ کے حوالے سے پاکستان میں کئی ممالک سے زیادہ تیزی سے کمی واقع ہوئی اور بروقت فیصلہ سازی اور اللہ کی رحمت سے ہم جلد ہی اس وباء کو کنٹرول کرنے کی پوزیشن میں آگئے ہیں۔

انہوں نے بتایا کہ  اسمارٹ لاک ڈاؤن، ایس او پیز پر عمل درآمد اور ٹی ٹی کیو کی حکمت عملی پر باقاعدگی سے عمل درآمد کیا گیا اور  این سی او سی کے قیام سے مُلکی سطح پر وباء کو کنٹرول کرنے کے حوالے سے مانیٹرنگ کے عمل کو بہتر بنایا گیا۔

ڈاکٹر ظفر مرزا نے بتایا ہے کہ مُلک میں سرکاری اسپتالوں کے معیار اور ناکارہ ہوچکے ہیں لیکن حکومت کی جانب سے تمام اسپتالوں میں اصلاحات کے عمل کی کوشش جاری ہے۔

انہوں نے واضح کیا کہ حکومت کی جانب سے سرکاری اسپتالوں کو پرائیوٹائیز کرنے کے حوالے سے تمام خبریں من گھڑت ہیں کیونکہ اسپتال حکومت سرپرستی میں ہی چلیں گے لیکن انتظامی امور اور بہتر فیصلہ سازی کے لیے لوکل مینجمنٹ کی خدمات لی جائیں گی۔

معاون خصوصی نے کہا کہ سرکاری اسپتالوں میں غریب مریضوں کو علاج کی فراہمی جاری رہے گی تاہم معیار پہلے سے بہتری کی جانب جائے گا۔

ان کا کہنا تھا کہ پاکستان میں موجودہ ہیلتھ سیکٹر میں مسائل کی ذمہ دار سابقہ حکومتوں کی پالیسیز ہیں کیونکہ سابقہ ادوار میں ہیلتھ سیکٹر کے مسائل کو کبھی بھی ترجیحی بنیادوں پر حل نہیں کیا گیا تھا اور آج یہ دیکھ کر حیرانگی ہوتی ہے وہ ہی لوگ آج ہیلتھ سیکٹر میں ترقی کے چیمپئن بننے کی بات کرتے ہیں۔