آج ہم آپ کو بتائیں گے کراچی میں واقعہ گٹر باغیچہ المعروف (ٹرانس لیاری پارک) کے بارے میں جو 480 ایکڑ تک پھیلا ہوا ہے۔

بلدیہ کراچی کے 1892 کے نقشے میں موجود گٹر باغیچہ جس کا احاطہ اس وقت 1016.76 ایکڑ تک پھیلا ہوا تھا جو آج کم ہوتا ہوا 480 ایکڑ تک پہنچ گیا ہے۔

آج کے دور میں مافیا اور سیاسی گروہ آدھے سے زیادہ گٹرباغیچے پر قابض ہوچکے ہیں جبکہ یہ باغیچہ کراچی کے علاقے پرانے گولیمار میں موجود ہے جو ٹرانس لیاری پارک سے جانا جاتا ہے جبکہ عرف عام میں اسے گٹر باغیچہ کہا جاتا ہے۔

گٹر باغیچہ کراچی کا سب سے قدیم اور ایشیا کا سب سے بڑا ‘اربن فارسٹ یا جنگل‘ ہوا کرتا تھا۔

رقبے کے لحاظ سے یہ گرینڈ سینٹرل پارک نیو یارک سے بھی بڑا تھامگر آج اس کے مختلف حصوں پر سیاسی، صنعتی اور دیگر گروہوں کا قبضہ موجود ہے۔

گذشتہ کئی ماہ سے گٹر باغیچہ کراچی کی خبروں کا اہم موضوع رہا ہے، جس کی سب سے بڑی وجہ سپریم کورٹ کا حالیہ فیصلہ ہے۔

اگست 1993ء میں کے ایم سی ہاؤسنگ اسکیم کے خلاف شہری نامی تنظیم نے ایک پٹیشن دائر کی جو ہائی کورٹ سے ہوتی ہوئی سپریم کورٹ تک پہنچی۔

اس کیس کا فیصلہ جنوری 2022 میں سنایا گیا جس کا فیصلہ سناتے ہوئے جسٹس گلزار احمد نے کہا کہ کے ایم سی ہاؤسنگ اسکیم کی الاٹمنٹ ختم کردی گئی ہے اور اس پر عمل در آمد کے لیے حکومت سندھ کو حکم دیا ہے۔

واضح رہے کہ 1979 میں کے ایم سی نے یہ پلاٹ اپنے ملازمین کی ہاؤسنگ اسکیم کے لیے دیا تھا جبکہ سپریم کورٹ نے اپنا فیصلہ سناتے ہوئے کہا تھا کہ ’’پارک کی زمین کسی رہائشی اسکیم کا حصہ نہیں بن سکتی جبکہ اسے صرف تعلیمی، مذہبی اور رفاحی کام کے لیے استعمال کیا جاسکتا ہے‘‘۔

گٹر باغیچے کی تاریخ

یہ بات ہے 18 ویں صدی کے آغاز کی جب انگریزوں نے افغانستان میں مدد فراہم کرنے پر دو بھائیوں امیر شیر علی خان اور مراد علی خان کو یہ زمین تحفے میں دی تھی۔

اس حوالے سے نجی ادارے سے بات کرتے ہوئے سماجی کارکن طاہر سواتی کا کہنا تھا کہ بلدیہ کراچی کے 1922 اور1946 کے نقشوں میں اس زمین پر شیر علی خان کی کوٹھی موجود تھی، جہاں اب بلدیہ عظمی کی ڈسپنسری موجود ہے۔

ان کا کہنا تھا کہ یہ باغیچہ پہلے کبھی امیر شیر علی خان کا کھیت کہلایا کرتا تھا۔

ماہرین کیا کہتے ہیں؟

تاہم اب اربن فارسٹ کے ماہرین کا خیال ہے کہ گٹر باغیچے کو کئی حصوں میں تقسیم کرکے اس پر جنگل لگایا جاسکتا ہے جو آج کے بدلتے موسم کی ضرورت بھی ہے جس کا فائدہ یقینی طور کراچی کو ہی ہوگا۔

اربن فارسٹ کیا ہے؟

اربن فارسٹ سے مراد وسیع پیمانے پر لگائے جانے والا گھنا جنگل ہے جبکہ گذشتہ چند سالوں میں سندھ حکومت نے کراچی کے ماحول کو بہتر بنانے کے لیے اربن فارسٹ کے کئی منصوبے شروع کیے ہیں۔